ბორჯომელი 7 წლის მოჭადრაკე საქართველოს ჩემპიონი გახდა

ჭადრაკში საქართველოს სკოლების ჩემპიონატი თბილისში ჩატარდა, რომელშიც მონაწილეობას 7, 9, 11 და 13 წლის 234 მოსწავლე იღებდა.

შვიდ წლამდე გოგონებში მოასპარეზე ბარბარე შონიამ ცხრიდან ცხრა გამარჯვება მოიპოვა და საქართველოს ჩემპიონი გახდა.

ბარბარე შონია სამცხე–ჯავახეთიდან პირველი მონაწილეა, რომელმაც მსგავსი ტიპის გამარჯვება მოიპოვა.

შვიდი წლის მოჭადრაკე სამი წლიდან თამაშობს, როგორც პატარა ბარბარეს დედა ამბობს, ეს ოჯახის ტრადიციაა.

„ჩევნს ოჯახში ყველა თამაშობს ბაბუა, ჩემი მეუღლე, ბარბარეს ბიძა და მამიდა. სამი წლის იყო ბარბარე, როდესაც ბაბუამ ჭადრაკი ასწავლა. მას შემდეგ ყველა ხელს ვუწყობთ წარმატების მიღწევაში“, – ამბობს ბარბარეს დედა ანი კახელი.

ბარბარე არაერთი ჩემპიონატის გამარჯვებულია.

„ეს იყო პირველი სერიოზული ჩემპიონატი, სადაც ბარბარემ გამარჯვება მოიპოვა და ცხრიდან ცხრა ქულა აიღო. ნონა გაფრინდაშვილის საერთაშორისო თასის ჩემპიონატზე ბარბარემ ბრინჯაოს მედალი აიღო“, – ამბობს ანი კახელი.

როგორც მწვრთნელი ამბობს, პატრა მოჭადრაკეს წინ დიდი წარმატება ელის.

„სამი წელია ჩემთნ დადის, მაგრამ მთავარი წვლილი ოჯახმა შეიტანა. ბაბუამ, რომელიც ყოველდღე ამეცადინებს. მე მასში დიდ პოტენციალს ვხედავ, როგორც ცნობილი მოჭადრაკე მიხეილ ბოტვინიკი ამბობდა, „მოჭადრაკეს თუ ჭადრაკის შიმშილი არ აქვს ბავშვს წარმატებული შედეგი არ ექნება“, ბარბის კი ეს ყველაფერი აქვს და ეს არის მთავარი“, – ამბობს ბარბარე შონიას მწვრთნელი უშანგი ჯანგირაშვილი.

ბარბარე შონიამ ევროპის სასკოლო ჩემპიონატის საგზური მოიპოვა, ჩემპიონატი საბერძნეთში, კუნძულ კრეტაზე გაიმართება. იგი საბერძნეთში ორ აპრილს გაემგზავრება.





[ნუკა სტეფნაძე, ბორჯომი]