„წამლების საყიდლად თვეში 2000 ლარი მჭირდება“ – 28 წლის ბარბარე დახმარებას ითხოვს

ბარბარეს ავთვისებიანი სიმსივნის დიაგნოზი ექიმებმა გასულ წელს დაუსვეს. „დედების ფონდის“ და ახლობლების დახმარებით, სამი მცირეწლოვანის დედას თურქეთში ოპერაცია გაუკეთდა, თუმცა ეს საკმარისი არ არის. მძიმე სენისგან განსაკურნებლად მას ყოველთვიურად 2000 ლარის წამლები სჭირდება.

„საქართველოში მითხრეს ვერ გადარჩება და ჯობია სიცოცხლის დარჩენილი დღეები სახლში, შვილებთან ერთად გაატაროსო. კეთილი ადამიანების დახმარებით ბარბარეს ოპერაცია თურქეთში გავუკეთეთ და გადავარჩინეთ კიდეც. სიმსივნე შეჩერებულია. ახლა საჭიროა წამლები და პერიოდულად გამოკვლევები იმისთვის რომ მდგომარეობა არ გართულდეს“, – ამბობს ბარბარეს მეუღლე დიაკვანი პანტელეიმონი.

პანტელეიმონმა აბასთუმანში ერთადერთი ბინა ბარბარესთვის ოპერაციის გასაკეთებლად გაყიდა, ახლა ექვსსულიანი ოჯახი ახალციხეში ნაქირავებ ბინაში ცხოვრობს. მათ არც სოციალური დახმარება აქვთ.

„თურქეთის კლინიკაში ოპერაციის თანხის ნაწილი ჯერ კიდევ გადასახდელი გვაქვს, უფულობის გამო ქიმიის გაკეთება დამიგვიანდა და ცუდად გავხდი, კატასტროფის ბრიგადამ თბილისში გადამიყვანა. ახლა უკეთ ვარ კეთილი ადამიანების დახმარებით, ცდილობენ წამლების ყიდვაში დაგვეხმარონ“, – ამბობს ბარბარე ძინძიბაძე.

წამლების გარდა, ბარბარეს დამატებითი გამოკვლევების ჩასატარებლად თურქეთში, იმ კლინიკაში ჩასვლა სჭირდება , სადაც ოპერაცია გაიკეთა, თუმცა ოჯახი უფულობის გამო ამას ვერ ახერხებს.

ვისაც სურვილი გაქვთ ბარბარეს დაეხმაროთ, თანხა „თიბისი" ბანკის ანგარიშზე უნდა ჩარიცხოთ.

"თიბისი" ბანკი: GE07TB7619745061100036

მიმღები: გელა ბაღდოშივილი

[თინათინ ზაზაძე, ახალციხე]