კახა ცაბაძის შემოქმედებითი საღამო

ახალციხის სამუსიკო სკოლაში ქართველი კომპოზიტორების საღამოები ყოველწლიურად იმართება. სკოლის მოსწავლეებმა ამჯერად კომპოზიტორ კახა ცაბაძის ნაწარმოებები შეასრულეს.

- ”ეს მხარე ხომ საქართველოს გულია. ქართული სული აქ რომ ტრიალებს, ისე ალბათ ბევრი სხვა მხარე ვერ დაიკვეხნის. ამ ბავშვებმა ძალიან ბევრი რამ დამანახეს, რაც თითქოს ბოლომდე მე არ ჩამიდია ჩემს ნაწარმოებში და ეს პედაგოგების დამსახურებაა” , - ამბობს საქართველოს კომპოზიტორთა შემოქმედებითი კავშირის თავმჯდომარე და ზაქარია ფალიაშვილის სახლ-მუზეუმის დირექტორი, კომპოზიტორი კახა ცაბაძე.

სამუსიკო სკოლას ქართველი კომპოზიტორები ხშირად სტუმრობენ. მაისში მოსწავლეებმა კომპოზიტორ ჯემალ ადამაშვილის შემოქმედებითი საღამო გამართეს.

- ”მსგავს საღამოებს ძალიან ხშირად ვატარებთ, ბატონი კახა ჩვენთან სტუმრად უკვე მესამედ არის. გარდა ამისა, ჩვენ მოწვეული გვყავდა ისეთი ქართველი კომპოზიტორები, როგორებიც არიან რუსუდან ხორავა, ელიზბარ ლონდარიძე, ვაჟა აზარაშვილი და ჩვენმა მოსწავლეებმა მათი შემოქმედებითი საღამოები წარმოადგინეს” , - ამბობს ახალციხის სამუსიკო სკოლის დირექტორი ცისანა ახვლედიანი.

დღევანდელ საღამოზე რადენიმე სიმღერა კომპოზიტორ გიორგი ცაბაძის შემოქმედებიდანაც შესრულდა.

[თამარ თოთაძე, ახალციხე]