ახალციხეში კახა ცაბაძის შემოქმედებითი საღამო გაიმართა [ფოტო]

მუსიკალურ სკოლაში გამართული საღამო კომპოზიტორის 60 წლის იუბილეს მიეძღვნა.

სკოლის მოსწავლეებმა ცაბაძის ნაწარმოებები შეასრულეს, რის შემდეგაც, სცენაზე საქართველოს კომპოზიტორთა კავშირის ინსტრუმენტული ტრიო ავიდა.

ფლეიტის, ვიოლინოსა და როიალის თანხლებით მათ რამდენიმე ნაწარმოები შეასრულეს, მათ შორის: საბავშვო პიესები, „ტანგო“ და „მონატრება“, რომლითაც მომღერალი გოგი დოლიძე გაიხსენეს.

ღონისძიებაზე თავად კახა ცაბაძემ მამის, გოგი ცაბაძისადმი მიძღვნილი სიმღერა შეასრულა.

„აქ რაღაც განსხვავებული, ხალასი ნიჭი აქვთ მუსიკის. ჩამოვიტანე ახალი ნაწარმოებები, რომლებიც დაიბეჭდა და მეგონა რომ გავახარებდი, მაგრამ თურმე უკვე იცოდნენ ესენი და სცენიდან მომასმენინეს. ეს ნიშნავს, რომ პროგრესულები არიან და ქართული მუსიკის მიმართ განსაკუთრებული დამოკიდებულება აქვთ“, - განმარტა კახა ცაბაძემ.

კომპოზიტორი ახალციხეში მუსიკალური სკოლის მოწვევით ჩამოვიდა: „ჩვენ ხშირად ვმართავთ ხოლმე ასეთ ღონისძიებებს. ამჟერად, კახა ცაბაძე მოვიწვიეთ და ვფიქრობ, საღამო ძალიან კარგი გამოვიდა“, - ამბობს მუსიკალური სკოლის დირექტორი ცისანა ახვლედიანი.







[თაკო ფეიქრიშვილი, ახალციხე]