ოლიმპიური ცეცხლი ახალციხეში [Photo]

ოლიმპიურმა ცეცხლმა სამცხე–ჯავახეთში მოგზაურობა ადიგენიდან დაიწყო. 20:00 საათზე ცეცხლს ახალციხეში ექვსი მეჩირაღდნე დახვდა და ესტაფეტით ქალაქი შემოიარეს. ახალციხელი მეჩირაღდნეები იყვნენ ახალციხის მერი გიორგი კოპაძე, სამცხე – ჯავახეთის სახელმწიფო უნივერსიტეტის რექტორი მერაბ ბერიძე, მესხეთის სახელმწიფო პროფესიული დრამატული თეატრის მსახიობი ვაჟა ნიკოლაშვილი, მოკრივე ჯაბა ხოსიტაშვილი, რაგბისტი მიშა ხარშილაძე და სპორტსმენი ზიგმუნდ ზილბერშტეინი.

ესტაფეტის შემდეგ ოლიმპიური ცეცხლი ახალციხის ციხის ტერიტორიაზე მიიტანეს და ქალაქის მერმა საზეიმო ვითარებაში აანთო.

პარალელურად მიმდინარეობდა ქართული ესტრადის მომღერლების კონცერტი. ახალციხის ციხის ტერიტორიაზე შეკრებილი მოსახლეობისთვის ანრი ჯოხაძემ, ნინო ჩხეიძემ, ნოდიკო ტატიშვილმა, ნინი ბადურაშვილმა, ქეთი ორჯონიკიძემ, სოფო პაპუაშვილმა, ლინდა ადამიამ, სოფო ბათილაშვილმა, გიორგი ფრუიძემ და სხვა მონაწილეებმა იმღერეს. ღონისძიება ევროპის ახალგაზრდული ოლიმპიური ფესტივალის "თბილისი 2015“–ის ფარგლებში ჩატარდა.

საქართველოს ოლიმპიური კომიტეტის თავმჯდომარემ ალექსი ახვლედიანმა ახალციხელებს ოლიმპიური ცეცხლის შემოსვლა მიულოცა.

შეგახსენებთ, რომ 31 მაისს ოლიმპიური ცეცხლი ასპინძასა და ახალქალაქში აინთება, ხოლო 1 ივნისს ნინოწმინდაში, საიდანაც 2 ივნისს ესტაფეტა წალკაში გაგრძელდება. 16 ივნისს კი ოლიმპიური ჩირაღდანი ბორჯომის მუნიციპალიტეტს მოივლის.













[ვარლამ წიკლაური, ახალციხე]