29 მაისს ოლიმპიური ცეცხლი ახალციხეში შემოვა

ოლიმპიური ცეცხლი ახალციხეში ბათუმიდან შემოვა, რომელსაც ახალციხელი მეჩირაღდნეები ადიგენში დახვდებიან. როგორც მერიის კულტურის სამსახურში განმარტავენ, ოლიმპიურ ცეცხლს ის მეჩირაღდნეები დახვდებიან, ვისაც ახალციხის განვითარებაში დიდი წვლილი აქვს შეტანილი. ახალციხელ მეჩირაღდნეებს შორის არიან ახალციხის მერი გიორგი კოპაძე და სამცხე–ჯავახეთის სახელმწიფო უნივერსიტეტის რექტორი მერაბ ბერიძე.

ოლიმპიური ცეცხლი ხვალ, 29 მაისს, "ახალციხის ციხეზე" აინთება, სადაც 21:00 საათზე ანრი ჯოხაძის, ნინო ჩხეიძის და ნოდიკო ტატიშვილის კონცერტი გაიმართება.

31 მაისს ოლიმპიური ცეცხლი ასპინძასა და ახალქალაქში აინთება, ხოლო 1 ივნისს ნინოწმინდაში, საიდანაც 2 ივნისს ესტაფეტა წალკაში გაგრძელდება.

16 ივნისს კი ოლიმპიური ჩირაღდანი ბორჯომის მუნიციპალიტეტს მოივლის.

[მანანა სარაშვილი, ახალციხე]