გადავადებული გახსნა

ახალციხეში, თამარაშვილის ქუჩაზე იუსტიციის სახლის მშენებლობა გასული წლის შემოდგომით დაიწყო. როგორც სამშენებლო კომპანია “არტესის” მენეჯერმა ლაშა ცხვარიაშვილმა “სამხრეთის კარიბჭეს” განუცხადა მშენებლობა მაისში უნდა დასრულებულიყო. თუმცა, სამშენებლო სამუშაოები ამ დრომდე მიმდინარეობს.

“ახლა “სეტკას” ვაკრავთ შენობას გარშემო. ამის კეთებას სამ დღეში დავასრულებთ”, - ამბობს “არტესის” მუშა ზაზა თამარაშვილი.

ამავე კომპანიის მშენებლობაზე პასუხისმგებელი პირის ბადრი ბადრიაშვილის განცხადებით, ამჟამად შენობას ასუფთავებენ და ავეჟს დგამენ.

მშენებლობის დასრულებისა და იუსტიციის სახლის გახსნის თარიღს ვერავინ აკონკრეტებს.

“ზუსტად ვერ გეტყვით რამდენ ხანში დასრულდება მშენებლობა, მაგრამ ალბათ 20-ისთვის დავამთავრებთ. გახსნისას გვინდა, რომ იუსტიციის სახლის გვერდით მშენებარე სკვერის მოწყობაც დასრულებული იყოს”, - აცხადებს ბადრიაშვილი.

ახალციხის მუნიციპალიტეტის გამგებელის გელა დემეტრაძის თქმით, უმჯობესი იქნება თუ ისტიციის სახლის გახსნის შესახებ მათ დავუკავშირდებით, ვინც ამ საქმეს ხელმძღვანელობს.

“ჯერ ოფიციალურად დანიშნული არ ვარ, ამიტომ კომენტარს ვერ გავაკეთებ. რომ გახსნიან იუსტიციის სახლს, მენეჯერად მაშინ დამნიშნავენ”, - გვითხრა საჯარო რეესტრის ეროვნული სააგენტოს ახალციხის ფილიალის უფროსმა ნიკა ბეგიშვილმა.

როგორც იუსტიციის სამინისტროს საზოგადოებასთან ურთიერთობის სამმართველოს უფროსმა ხათუნა იოსევამ “სამხრეთის კარიბჭეს” განუცხადა, ახალციხეში იუსტიციის სახლი უახლოეს თვეებში გაიხსნება.

[თამუნა უჩიძე, ახალციხე]