ბორჯომსა და ახალქალაქში იუსტიციის სახლის ფილიალები აშენდება

საქართველოს მასშტაბით იუსტიციის სახლების ფილიალები ფოთში, თიანეთში, ყაზბეგში, ონში, ლაგოდეხში, ბორჯომსა და ახალქალაქში აშენდება. ახალი პროექტები იუსტიციის მინისტრმა დიპლომატთა კორპუსს, მთავრობისა და ბიზნეს სექტორის წარმომადგენლებს წარუდგინა.

იუსტიციის სახლის ფილიალის მშენებლობა ბორჯომში 2015 წლის 1 დეკემბერს უნდა დასრულდეს და სავარაუდოდ 1 730 000 ლარი დაჯდება, ახალქალაქში კი მშენებლობის დასრულება 2016 წლის სექტემბერში იგეგმება და დაახლოებით 1 900 000 ლარი დაიხარჯება.

იუსტიციის სამინისტროს ინფორმაციით, ამჟამად იუსტიციის სახლი საქართველოს მასშტაბით 13 ფილიალითაა წარმოდგენილი. ყოველდღიურად თბილისის, გორის, ოზურგეთის, გურჯაანის, თელავის, ქუთაისის, რუსთავის, ბათუმის, ყვარლის, მარნეულის, ახალციხის, ზუგდიდის და მესტიის იუსტიციის სახლებში მომსახურებას 30 000-მდე მომხმარებელი იღებს.

[sknews.ge]