ნიაზ დიასამიძე - ახალციხელი სამბისტი წლის მთავარი ტურნირის პრიზიორია

ფოტო: თაკო კიკალიშვილი

16 დეკემბერს, თბილისში გამართულ ქართული ჭიდაობის ჩემპიონატზე, ნიაზ დიასამიძემ მესამე ადგილი მოიპოვა. ამბობს, რომ ეს მის კარიერაში კიდევ ერთი წინ გადადგმული ნაბიჯია. სპორტსმენი 21 წლისაა და უკვე არაერთი წარმატება აქვს. მის მიღწევებს შორის მნიშვნელოვან ადგილს იკავებს სამბოში მსოფლიო პრიზიორის ტიტული, ასევე არის: ევროპის ვიცე ჩემპიონი, საქართველოს ორგზის ჩემპიონი სამბოში და ასევე საქართველოს ჩემპიონი ქართულ ჭიდაობაში.

„ამ გამარჯვებებიდან ყველაზე მნიშვნელოვანი მსოფლიოს მედალია. თუმცა ვფიქრობ, რომ ფალავნობაზე მესამე ადგილის აღება, ჩემი ასაკის გათვალისწინებით, კარგი შედეგია. ძალიან რთული ტურნირი იყო“, - ამბობს ნიაზი.

ჭიდაობა ახალციხეში დაიწყო. მაშინ მესამე კლასში იყო და სპორტის ეს სახეობა მშობლებმა შეურჩიეს. გარკვეული დროის შემდეგ მიხვდა, რომ მისთვის უფრო მეტად პერსპექტიული სამბო და ძიუდო იქნებოდა, ამიტომ ვარჯიში თბილისში გააგრძელა: „თავიდან მშობლებმა გადაწყვიტეს, რომ უნდა მევლო ჭიდაობაზე. ძალიან პატარა ვიყავი როცა დავიწყე. ახლა კი სპორტის გარეშე ალბათ წარმოუდგენელია ცხოვრება. მაშინ ახალციხეში იყო ძალიან კარგი ტრენერი, შემდეგ ის საზღვარგარეთ წავიდა და მეც თბილისში წამოვედი, თან ძიუდოს სკოლა არ იყო ახალციხეში“.

ამბობს, რომ გზა რთული იყო, თუმცა საბოლოოდ შედეგამდე მივიდა: „ძალიან დიდ შრომას მოითხოვს. გარკვეული პერიოდის განმავლობაში, ცალკე სწავლა და ცალკე სამჯერადი ვარჯიში მქონდა. ამის გარდა არაფრისთვის მრჩებოდა დრო. რთულიც იყო და საკმაოდ დიდი კონკურენციაც იყო“.

დიასამიძე სამბოსა და ძიუდოში პროფესიონალურად უკვე მერვე წელია ვარჯიშობს. ახლა შეჯიბრებებში -100 კილოგრამ წონით კატეგორიაში ჭიდაობს. ყველგან ახალციხის სახელით გადის და ცდილობს საკუთარი მხარე სხვებსაც გააცნოს.

„ყველგან ახალციხის სახელით გავდივარ. მინდა, რომ ვასახელო ჩემი მხარე. იმიტომ, რომ მოჭიდავეები ნაკლები კი არა, საერთოდ არ გვყავს. ამ სახეობაში მე და ბექა ბერძენიშვილი ვართ მარტო“, - ამბობს დიასამიძე.

რაც შეეხება სპორტსმენების მხარდაჭერას, სამბისტი ამბობს, რომ ამ კუთხით ყურადღება ნაკლებია, თუმცა პირადად მას ადგილობრივი თვითმმართველობიდან რამდენჯერმე ხელი შეუწყეს: „შარშან, ახალციხეში ჩატარდა საქართველოს ჩემპიონატი ქართულ ჭიდაობაში და მე გავხდი ჩემპიონი ანუ მედალი დავტოვე ახალციხეში ახალციხელმა სპორტსმენმა და დამაჯილდოვეს. ახალციხის სახელით ვჭიდაობ და ასე თუ ისე გარკვეული მხარდაჭერა მაქვს. ბევრ რამეში შემიწყეს ხელი. მცირედ ფინანსურადაც დამეხმარნენ. თუმცა უფრო მეტია საჭირო სპორტსმენებისთვის“.

სპორტსმენი ახლა კიდევ ერთი ჩემპიონატისთვის ემზადება. 29 დეკემბერს იგი ძიუდოში საქართველოს პირველობისთვის იბრძოლებს.


ფოტო: თაკო კიკალიშვილი

[თაკო ფეიქრიშვილი, ახალციხე]