'ოცნების' მიერ ორგანიზებულ შეკრებას ახალციხიდან 3 000–მდე ადამიანი დაესწრება [ფოტო/ვიდეო]

„ქართული ოცნების“ წრამომადგენლები მხარდამჭერებს ახალციხეში რამდენიმე ლოკაციაზე აგროვებდნენ. ავტობუსები იდგნენ უნივერსიტეტის, მერიის და საბავშვო ბაღების შენობების მიმდებარედ.

„სამხრეთის კარიბჭეს“ ავტობუსებში სკოლის მოსწავლეები და სტუდენტებიც დაგვხვდნენ. ჟურნალისტის გამოჩენამ ბაღების და მერიის თანამშრომელების გაღიზიანება გამოიწვია.


„ქართული ოცნების“ ახალციხის საოლქო ორგანიზაციის აღმასრულებელი მდივანი გვარამაძის თქმით, ღონისძიებაზე ახალციხიდან დაახლოებით 3 000 კაცი წავიდა.

პოლიტიკური გაერთიანება „ქართული ოცნება - დემოკრატიული საქართველო“ დღეს თავისუფლების მოედანზე ღონისძიებას „საქართველოს გზა ევროპისკენ“ გამართავს. პარტიაში აცხადებენ, რომ ღონისძიების ინიციატორი მათი ახალგაზრდული ორგანიზაციაა და ის საქართველოს ევროპის საბჭოს თავმჯდომარეობას ეძღვნება.

პარტია „ქართული ოცნების“ გენერალური მდივანი კახა კალაძე აცხადებს, რომ დღეს არის საზეიმო ღონისძიება ყველა იმ ადამიანისთვის, ვისთვისაც საქართველოს ევროპული მომავალი ღირებული და მნიშვნელოვანია. ამ დღესთან დაკავშირებით პარტიამ საქართველოს რეგიონებიდანაც მიიწვია მხარდამჭერები და მათ ტრანსპორტირებასაც უზრუნველყოფს.

არასამთავრობო ორგანიზაციების განცხადებით, „ქართული ოცნების“ მიერ დაგეგმილი აქციისთვის მოქალაქეთა მობილიზება მუნიციპალიტეტების საჯარო მოხელეებზე ზეწოლის ფონზე მიმდინარეობდა. პარტიის კოორდინატორების გარდა, მოქალაქეთა მობილიზებაში აქტიურად არიან ჩართული მერების წარმომადგენლები სოფლებში და სოფლების საკრებულოს დეპუტატები.

რეგიონებში სავარაუდო ზეწოლის შესახებ ისაუბრა სახალხო დამცველმაც.

„მოქალაქეების განცხადებით, აქციაში მონაწილეობის მიღებაზე უარის შემთხვევაში ხელმძღვანელი პირები სამუშაო ადგილებზე სამომავლოდ პრობლემების შექმნაზე მიანიშნებენ“, – წერია ომბუდსმენის გავრცელებულ განცხადებაში.











ასევე ნახეთ: ‘სამსახურის დაკარგვით ემუქრებიან ’ – ‘ოცნების’ აქციისთვის მოსახლეობის მობილიზება მიმდინარეობს

[მარიამ ბარძიმაძე, რობი ზარიძე, ზურა სულაბერიძე]