'ლელო' პრეზიდენტის განცხადებაზე – 'დაუყოვნებლივ მოუხადოს ბოდიში თითოეულ ჯარისკაცს'

„ლელო“ საქართველოს პრეზიდენტის გუშინდელ გამოსვლას ეხმაურება. საზოგადოებრივი მოძრაობის განმატებით, პრეზიდენტის განცხადება არის ანტისახელმწიფოებრივი და ჩვენი ქვეყნის თავდაცვისუნარიანობისთვის დამაზიანებელი.

„საქართველოს პრეზიდენტის - საქართველოს თავდაცვის ძალების უმაღლესი მთავარსარდლის დღევანდელი განცხადება იმის შესახებ, რომ - „არც ჯარი გვაქვს, არც იარაღი და არც გვექნება” - წარმოადგენს ანტისახელმწიფოებრივ და საქართველოს ეროვნული ინტერესების წინააღმდეგ მიმართულ ქმედებას, რომელიც პირდაპირ ინტერესებშია ოკუპანტი ქვეყნის ხედვებთან და საქართველოს თავდაცვის ძალების დემორალიზაცია-დემოტივაციის მცდელობაა.

პრეზიდენტმა თავისი განცხადებით, პირველ რიგში, შეურაცხყოფა მიაყენა ჩვენი ქვეყნის სადარაჯოზე მყოფ, ათასობით პატრიოტ ჯარისკაცს, ვეტერანებს, საერთაშორისო მისიებში და ჩვენი ქვეყნის ერთიანობისთვის დაღუპულ გმირებს, რომლებიც სამშობლოსთვის ბრძოლას შეეწირნენ. ასევე საერთაშორისო მისიებში მყოფ შენაერთებს, რომელთა გმირულ მსახურებაზე დგას ქვეყნის შეიარაღებული ძალების პოტენციალი“, – წერია განცხადებაში.

საქართველოს პრეზიდენტმა გუშინ, 10 დეკემბერს ქართული ენისა და კულტურის დღეზე სიტყვით გამოსვლის დროს განაცხადა, რომ – ჩვენ არც ჯარი გვაქვს, არც იარაღი და არც გვექნება. არც ის დიდი ეკონომიკური პოტენციალი გვაქვს, რომ რეგიონი დავიპყროთ, მაგრამ ჩვენ გვაქვს ის ძალიან ძლიერი იარაღი, რასაც ჰქვია ცოდნა, მეცნიერება, კულტურა.

[sknews.ge]