ირაკლი ღარიბაშვილი: '26 მაისი ერთ–ერთი ყველაზე დიდი თარიღია საქართველოს ისტორიაში'

საქართველოს პრემიერ–მინისტრმა ირაკლი ღარიბაშვილმა განაცხადა, რომ 26 მაისი ერთ–ერთი ყველაზე დიდი თარიღია საქართველოს ისტორიაში. ეს დღე მან განსაკუთრებით წვევამდელებს მიულოცა, რომელთაც დღეს ფიცი დადეს.

პრემიერ–მინისტრის გამოსვლას უცვლელად გთავაზობთ:

„გამარჯობათ, ბატონებო!
ყველას გილოცავთ 26 მაისს, საქართველოს დამოუკიდებლობის დღეს! ეს არის ერთ-ერთი ყველაზე დიდი თარიღი ჩვენი ქვეყნის ისტორიაში, ეს არის დღე, რომელმაც 96 წლის წინ თავისუფლება მოუტანა ჩვენს ქვეყანას.

დღევანდელი დღე განსაკუთრებულად მინდა მივულოცო ჩვენს წვევამდელებს! დღეს თქვენ საზეიმოდ დებთ ფიცს ქვეყნისა და ხალხის წინაშე! დღეს თქვენ სამშობლოს ჯარისკაცები ხდებით, დღეიდან თქვენ სამშობლოს სადარაჯოზე, ხალხისა და ქვეყნის სამსახურში დგებით! გერქვას საქართველოს ჯარისკაცი, ეს არის უდიდესი პატივი და უდიდესი პასუხისმგებლობა. მე მჯერა, რომ თქვენ წარმატებით შეასრულებთ ჯარისკაცის რთულ, საპატიო მისიას და პირნათლად მოიხდით ვალს ჩვენი სამშობლოს წინაშე. მებრძოლი სული, ღმერთისა და სამშობლოს სიყვარული - ეს არის ის, რაც ჩვენს ქართულ გენშია და ეს არის ის, რაც ყველაზე მეტად სჭირდება ჯარისკაცს და მე მჯერა, რომ თითოეული თქვენგანი სწორედ ამ სულისკვეთებით იწყებს სამხედრო სამსახურს.

დღევანდელი დღე მინდა მივულოცო ჩვენს შეიარაღებულ ძალებს, ჩვენს ვეტერანებს, თითოეულ ჯარისკაცს და ოფიცერს, რომლებიც საკუთარი სიცოცხლის ფასად იცავენ ჩვენს სამშობლოს, ჩვენი ქვეყნის სახელმწიფოებრივ ინტერესებს.

საქართველოს დამოუკიდებლობის დღეს განსაკუთრებული პატივითა და მოწიწებით მინდა გავიხსენო საქართველოს ტერიტორიული მთლიანობისთვის ბრძოლასა და საერთაშორისო სამშვიდობო მისიებში დაღუპული ჩვენი ჯარისკაცები, ჩვენი გმირები. მე ქედს ვიხრი მათ წინაშე.

ჩემო მეგობრებო,
საქართველო მონაწილეობს საერთაშორისო სამშვიდობო მისიებში და ჩვენი პარტნიორი და მეგობარი ქვეყნების ჯარების მხარდამხარ ვიბრძვით მსოფლიოში მშვიდობისთვის. ამიტომ მინდა განსაკუთრებულად მივესალმო და მივულოცო 26 მაისი საერთაშორისო სამშვიდობო მისიებში მონაწილე ჩვენს სამხედროებს, რომლებსაც ახლა ყველაზე საპატიო მისია აკისრიათ - ისინი საქართველოს სახელმწიფოს და ჩვენი შვილების მომავალს იცავენ უცხო მიწაზე. ჩვენი გმირი სამხედროების განსაკუთრებულ თავდადებასა და ბრძოლისუნარიანობას ყველა ერთხმად აღიარებს მთელ მსოფლიოში. და ჩვენ ეს ძალიან გვეამაყება!

წვევამდელებო,
გისურვებთ, არასოდეს გაგნელებოდეთ ვაჟკაცური შემართება და სამშობლოს სიყვარული. მე მჯერა, რომ თქვენ ღირსეულად ატარებთ საქართველოს ჯარისკაცის საპატიო სახელს და ერთგულად ემსახურებით ჩვენს სამშობლოს! რაც მთავარია, - გისურვებთ მშვიდობას!

საქართველო ამაყობს თქვენით! თქვენთან ერთად ჩვენს ქვეყანას წინ დიდი მომავალი აქვს.
კიდევ ერთხელ გილოცავთ საქართველოს დამოუკიდებლობის დღეს!

ღმერთი იყოს ჩვენი მებრძოლი ერის, ჩვენი დიდი ქვეყნის, ჩვენი სამშობლოს მფარველი!– განაცხადა პრემიერმა.

ფიცის მიღებისა და პრემიერის სიტყვით გამოსვლის შემდეგ, ახალციხის ციხეში, მონიტორის საშუალებით, ქართული ესტრადის ვარსკვლავების კონცერტს ადევნებდნენ თვალს. ამ წუთებში კი თვითშემოქმედებითი კოლექტივების, სამეჯლისო ცეკვებისა და ინდ. შემსრულებლების კონცერტი მიმდინარეობს.

შეგახსნებთ, ახალციხეში დამოუკიდებლობის დღის აღნიშვნა დილიდან მიმდინარეობს.



[თამარ თოთაძე, მანანა სარაშვილი, ახალციხე]