ახალციხეში ათი დღის წინ გაკეთებული ცხაურები ისევ დაზიანდა

მეექვსე საჯარო სკოლასთან სანიაღვრე არხებზე დაზიანებული რკინის ცხაურების შესახებ „სამხრეთის კარიბჭე“ პერიოდულად წერდა. ბოლოს მასალა ვებ-გვერდზე ათი დღის წინ გამოქვეყნდა. იმავე დღეს, თვითმმართველობამ ცხაურები აღადგინა, თუმცა ამჟამად რკინის კონსტრუქციები ისევ დაზიანებულია.

“უკვე თხუთმეტჯერ გამოვცვალეთ ცხაურები, მარაგიც გველევა. ამ გზაზე დადიან შპს „არალის“ მძიმეწონიანი მანქანები, რომლებიც აზიანებენ ცხაურებს. გამოვცვალეთ და კიდევ ექვსი ცხაურია დაზიანებული. მივეცით ამ კომპანიას რეკომენდაცია, რომ დაზიანებული ადგილები აღადგინოს დროულად, თუმცა უშედეგოდ“, - ამბობენ ახალციხის მერიაში.

შპს „არალის“ მაღალი გამავლობის მქონე, მძიმეწონიან მანქანებს სამშნებლო მასალა გადააქვთ. კომპანია ბაღინაშვილის ქუჩაზე ასფალტს ასხამს და მათი ტექნიკა მეექვსე სკოლის გავლით დადის.

კომპანიაში აცხადებენ, რომ მათი ბრალეულობა არ იკვეთება და შესაბამისად, არც დაზიანებული ცხაურების შეკეთებას აპირებენ.

„ცხაურებს თუ აყენებდნენ, დაეყენებინათ ნორმალური. ცხაური იმისთვის არ ყენდება, რომ ქვეითმა გადაიაროს ზემოდან, კეთდება იმისათვის, რომ მსუბუქ ავტომობილსაც და მძიმესაც გაუძლოს. თუ უხარისხო პროდუქცია იყო დაყენებული და ჩატყდებოდა, ჩვენი პასუხისმგებლობა არ არის. ვინც გააკეთა და ვინც ჩაიბარა პასუხისმგებლობა ეკისრება იმას, ახალციხის მერიას“, - ამბობს შპს „არალის“ დირექტორი დემეტრე თათეშვილი.

მისივე თქმით, მანქანები მხოლოდ ზღვრული წონით დადიან და პრობლემას მათი გადაადგილება არ უნდა ქმნიდეს: „მანდ ჩვენი არცერთი მანქანა არ დადის ზედმეტი წონით. დაშვებულ წონას კი ვერ გაუძლო მათ ცხაურებმა. რაც იმას ნიშნავს, რომ უხარისხო პროდუქციაა ან არასწორად გაკეთებული.სახანძროს მანქანა რომ შესულიყო და ჩაენგრია იმას გააკეთებინებდნენ? შეიძლება ეთხოვათ და გავაკეთებდით, მაგრამ თუ რამეს არახარისხიანს აკეთებენ, მაგაზე პასუხისმგებლობა ჩვენ არ გვაქვს“.



[თაკო ფეიქრიშვილი, ახალციხე]