რატომ ჭიანურდება კოსტავას ქუჩაზე დაზიანებული ცხაურების შეცვლა

ადგილობრივების თქმით, სანიაღვრე არხზე ჯერ ერთი ცხაური გაფუჭდა, ხოლო რამდენიმე დღის შემდეგ კიდევ რამდენიმე დაზიანდა. უკვე თვეზე მეტია, რაც ამ ადგილას ერთი ცხაური სანიღვრე არხიდან მთლიანად ამოვარდნილია, ხოლო ორი კი გატეხილია.

„ამ გზაზე გამგეობის თანამშრომლები თითქმის ყოველ დღე დადიან და ვერ ხედავენ რომ გასაკეთებელია?!“ - კითხულობენ ამავე ქუჩაზე მცხოვრებლები.

მათივე თქმით, ამ ადგილას ავტომობილებს გადაადგილებაც უჭირთ, რაც ხშირად ავარიულ მდგომარეობასაც ქმნის.

ახალციხის მუნიციპალიტეტის გამგეობაში აღნიშნული პრობლემის შესახებ იციან. როგორც ქალაქის რწმუნებული დავით სამსონიძე ამბობს,ამ პრობლემის მოგვარება უახლოეს პერიოდში იგეგმება. თუმცა, კონკრეტულად როდის გაკეთდება სანიაღვრე არხზე ახალი ცხაურები რწმუნებული ვერ აკონკრეტებს.

„ვიცით, რომ კოსტავას ქუჩაზე ცხაურებია დაზიანებული. თავიდან მხოლოდ ერთი იყო ამოვარდნილი და გავაკეთეთ, რამდენიმე დღის მერე სხვებიც დაზიანებულა, არ ვიცოდით გატეხილი თუ იყო. ახალ ცხაურებს გამოვიწერთ და ახლო მომავალში აუცილებლად გავაკეთებთ“,-ამბობს დავით სამსონიძე.

ადგილობრივები ამბობენ, რომ დანარჩენი ცხაურებიც რომ არ დაზიანდეს, პრობლემა რაც შეიძლება მალე უნდა მოგვარდეს.

[მანანა სარაშვილი, ახალციხე]