ახალციხის მუნიციპალიტეტის ბაღებს საჩუქრად სათამაშოები გადაეცათ

სათამაშოები და ნაძვის ხეები ბაღებს დღეს, 17 დეკემბერს დაურიგეს. ამისთვის ჯამში 4.899 ლარი დაიხარჯა.

„საახალწლოდ პატარებს ტკბილეულსაც დავურიგებთ“, – ამბობს ახალციხის მუნიციპალიტეტის გამგებელი ზაზა მელიქიძე.

გასულ კვირას მუნიციპალიტეტის ბაღებს სამზარეულოსთვის ტექნიკა და ჭურჭელი გადაეცათ.

„სურსათის ეროვნულ სააგენტოს ჰქონდა შენიშვნები, ითხოვდნენ, რომ ნიკელის ქვაბები გამოგვეყენებინა სამზარეულოში. თითო ბაღს სხვადასხვა ზომის 5–5 ქვაბი გადავეცით. ასევე შევუძინეთ ის ჭურჭელი, რაც სჭირდებოდათ. ამისთვის 4.557 ლარი დაიხარჯა. მაცივრებისა და გაზქურების შესაძენად კი დაახლოებით 6.000 ლარი. ამ თანხით 2 მაცივარი, 2 გაზურა და 5 გამწოვი შევიძინეთ. გამწოვი ყველა ტიპიურ ბაღს გადაცევით მაცივარი და გაზურა კი იმ ბაღებს, სადაც ყველაზე მეტი აღსაზრდელი იყო“, – ამბობს ახალციხის მუნიციპალიტეტის სკოლამდელი აღზრდის დაწესებულებათა გაერთიანების ხელმძღვანელი ლელა ზაზაძე.

ახალციხის მუნიციპალიტეტში განმარტავენ, რომ 2015 წლიდან საბავშვო ბაღებს მეტი ყურადღება მიექცევა. დაგეგმილია ყველა იმ ბაღის რეაბილიტაცია, რომლებიც სარემონტოა. იგეგმება ახალი ბაღების გახსნაც.

„მეორე შახტაში ახალი ბაღის გახსნას ვგეგმავთ, შენობის რეაბილიტაცია უკვე მიმდინარეობს. ასევე სოფელ წნისში გადმოგვეცა ძველი სკოლის შენობა, სადაც ბაღი განთავსდება. 2017 წლამდე შევეცდებით ყველა სოფელს ქონდეს საბავშვო–ბაღი. იმედი გვაქვს არასამთავრობო ორგანიზაციების თანადაფინანსების“, – ამბობს ზაზა მელიქიძე.

ახალციხის მუნიციპალიტეტში 8 სკოლამდელი აღზრდის დაწესებულებაა, აქედან სამი ალტერნატიული. ბაგა–ბაღებში ჯამში 475 აღსაზრდელი ირიცხება. ახალციხის მუნიციპალიტეტის გამგებლის განცხადებით, მომავალი წლიდან ალტერნატიული ბაღების ტიპიურ ბაღებად გადაკეთება იგეგმება.

[თინათინ ზაზაძე, ახალციხე]