პოლიციელებსა და არასრულწლოვნებს შორის მომხდარი ჩხუბის ფაქტს ომბუდსმენი შეისწავლის

„ჩვენი ინიციატივით დავიწყეთ ამ საქმის შესწავლა“,– გვითხრეს სახალხო დამცველის აპარატში.

ახალციხეში, 19 ოქტომბერს რესტორან „რაბათის“ მიმდებარედ, სკოლის მოსწავლეებსა და სამართალდამცავებს შორის დაწყებული შეკამათება, ფიზიკურ დაპირისპირებაში გადაიზარდა. მომხდარის შედეგად ერთი პოლიციელი დაშავდა, სახეში დაზიანებები მიიღო ერთმა არასრულწლოვანმაც.

დაშავებული მეათე კლასელის მამა ამბობს, რომ მომხდარის შესახებ მხოლოდ ის იცის, რომ რესტორნის წინ მყოფ მის შვილს პოლიციელმა თავი სახეში ჩაარტყა. რატომ დაიწყო ჩხუბი ეს მისთვის უცნობია.

„როგორც ჩემმა შვილმა მითხრა, ორ მეგობართან ერთად რესტორნის წინ იდგა და ლაპარაკობდა. მეგობრები საუბრობდნენ იმის შესახებ თუ როგორ კარგად ატარებდნენ დროს. მერე მივიდა ერთი პოლიციელი და თავი ცხვირში ჩაარტყა. შემდეგ ჩემი შვილი სისხლის მოსაბანად საპირფარეშოში მეგობარმა შეიყვანა. ვიყავით დაკითხვაზეც და ჩაუტარდა ექსპერტიზაც. მეტი არაფერი ვიცი, ჩემი შვილი სხვას არაფერს მეუბნება“,– ამბობს 15 წლის ბიჭის მამა.

„სამხრეთის კარიბჭე“ ინციდენტში მონაწილე ერთ–ერთი პოლიციელის მამას დაუკავშირდა: „ჩემი შვილი ქალაქში ცხოვრობს. თუ შევძელი და დავუკავშირდი გადავცემ, რომ დარეკეთ“.

19 ოქტომბერს მომხდარი ჩხუბის შემდეგ, საქართველოს პროკურატურამ გამოძიება 126 მუხლის პირველი პრიმა ნაწილით დაიწყო, რაც არასრულწლოვანზე ძალადობას გულისხმობს.

[მარიამ ბარძიმაძე, ახალციხე]