ახალციხეში მასწავლებელმა მოსწავლეს თმა მოქაჩა – საქმეს შსს იძიებს

შემთხვევა გასულ კვირას მოხდა. როგორც სკოლაში ამბობენ, მეექვსე კლასის მოსწავლეები ხმაურობდნენ, ქართულის მასწავლებელმა კი მათი დამშვიდება და გაკვეთილის დაწყება ვერ შეძლო.

„მასწავლებელს გაკვეთილი უნდა ჩაეტარებინა, თუმცა კლასში აურზაური დახვდა. მოსწავლეები ვერ გააჩერა. ბავშვები ერთმანეთს რაღაცებს ესროდნენ, რამდენჯერმე დაუყვირა მასწავლებელმა და მერე ერთ–ერთი გოგო თმიდან ითრია“, – ამბობენ სკოლაში.

მომხდარის შემდეგ, მეექვსე კლასელი გოგონა მანდატურთან მივიდა და უთხრა რაც მოხდა.

მანდატურის სამსახურმა სკოლის ადმინისტრაციას შეატყობინა, დაიწყო მოკვლევა და მასწავლებელს დარღვევის ოქმი დაუწერა.

„ფაქტი მოხდა, მანდატურის სამსახურმა კანონით გათვალისწინებული ყველა ზომა მიიღო“, – გვითხრეს მანდატურის სამსახურში.

სკოლამ ფაქტის შესახებ პოლიციასაც შეატყობინა, რის შემდეგაც მოსწავლეები დაკითხვაზე იმყოფებოდნენ.

შსს ფაქტს სისხლის სამართლის კოდექსის 126 მუხლის პირველი პრიმა ნაწილით იძიებს, რაც გულისხმობს ძალადობას არასრულწლოვანზე.

[მარიამ ბარძიმაძე, ახალციხე]