ადიგენში ავარიისას დაშავებული ერთი პირი საავადმყოფოდან გაწერეს

როგორც ადიგენის საავადმყოფოს ხელმძღვანელი ლალი ბალახაშვილი „სამხრეთის კარიბჭესთან“ განმარტავს, 30 წლამდე კაცს სხეულზე დაჟეჟილობები აღენიშნებოდა და მკურნალობის შემდეგ გუშინ, ცხრა ოქტომბერს ღამით საავადმყოფოდან გაეწერა.

ავარიისას დაშავებული სამი პირი, რომლებსაც თავის ქალაზე პოლიტრამვები ჰქონდათ, თბილისის სამედიცინო დაწესებულებაში აგრძელებენ მკურნალობას, ოთხივე მათგანი ადიგენის სოფელ ლელოვნიდან არიან.

როგორც საავდმყოფოს ხელმძღვანელი ამბობს ავტოსაგზაო შემთხვევის შედეგად ოთხის გარდა, პირველადი სამედიცინო დახმარება დასჭირდა ერთ–ერთი ავტომობილის მძღოლსაც: „საავადმყოფოში არც შემოსულა, მცირე დაზიანებები ჰქონდა და ადგილზე გაეწია დახმარება“.

დაბის ცენტრში, ავტოსაგზაო შემთხვევა გუშინ, ცხრა ოქტომბერს მოხდა, ერთმანეთს გზაჯვარედინზე საპირისპიროდ მოძრავი ორი მსუბუქი მანქანა შეეჯახა. მომხდარზე შსს–მ ძიება სსკ–ს 276 მუხლის მეორე ნაწილით დაიწყო.

[ლუბა გიორგაძე, ადიგენი]