განათლების სამინისტროს აუდიტის რეაგირება წითელ ყელსახვევებზე

ახალციხის მეხუთე და მესამე საჯარო სკოლებში პირველკლასელებისთვის წითელი ყელსახვევების ფაქტზე მოკვლევა დასრულდა, თუმცა დასკვნა არ შედგენილა. ამის შესახებ, განათლების სამინისტროს შიდა აუდიტის დეპარტამენტიდან, „სამხრეთის კარიბჭესთვის“ გამოგზავნილ წერილშია ნათქვამი.

დოკუმენტის მიხედვით, ერთადერთი რეაგირება, რაც ამ ფაქტს მოჰყვა, ის არის, რომ რესურსცენტრებს ეთხოვათ, საბჭოთა სიმბოლიკების შესახებ სკოლებში მასწავლებლებს ინფორმაცია მიაწოდონ.

„შიდა აუდიტის დეპარტამენტის მიერ სამინისტროს ტერიტორიულ ორგანოებს - საგანმანათლებლო რესურსცენტრებს ეთხოვათ, მათდამი დაქვემდებარებული ზოგადსაგანმანათლებლო დაწესებულებების (მათ შორის, სსიპ - ქალაქ ახალციხის N3 და N5 საჯარო სკოლების) ინფორმირება, რათა არ დაუშვან და აღმოფხვრან კომუნისტური ტოტალიტარული ან/და ფაშისტური სიმბოლიკის გამოყენება და გაატარონ კანონმდებლობით გათვალისწინებული პრევენციული ღონისძიებები“, – ნათქვამია განათლების სამინისტროს მიერ გამოგზავნილ წერილში.

ახალციხის მეხუთე და მესამე საჯარო სკოლებში, ოთხი თვის წინ, „ანბანის გაცილების“ ღონისძიებაზე, პირველკლასელებს წითელი ყელსახვევებით მიაღებინეს მონაწილეობა, რამაც საზოგადოებას საბჭოთა პიონერები გაახსენა. სკოლების მიერ საბჭოთა სიმბოლიკების გამოყენებაზე საუბრობდნენ იურისტებიც.

ორივე სკოლაში მოკვლევა განათლების აუდიტის სამსახურმა დაიწყო. თუმცა, ახალციხე ერთადერთი არ ყოფილა, სადაც წითელი ყელსახვევებით პირველკლასელებმა ღონისძიება გამართეს. მსგავსი ფაქტი დაფიქსირდა გურიის ერთ–ერთ სკოლაშიც. მაშინ სამინისტრომ ყველა სკოლას მოუწოდა, მსგავსი ფაქტისაგან თავი შეეკავებინათ, თუმცა 16 სექტემბერს, ახალი სასწავლო წლის დაწყებასთან დაკავშირებით, ქობულეთის მესამე საჯარო სკოლის პირველკლასელებს, ბიჭებს ლურჯი, ხოლო გოგონებს წითელი ყელსახვევები დაახვედრა დამრიგებელმა და ღონისძიებაზეც ასე გამოიყვანა.

[ლუბა გიორგაძე, ახალციხე]