წითელი ყელსახვევების საქმეზე აუდიტმა დასკვნა დადო, თუმცა სკოლებისთვის ცნობილი არ არის

განათლების სამინისტროში ამბობენ, რომ აუდიტის დასკვნას, რომელიც ახალციხის ორ სკოლას ეხება, ვერ გაასაჯაროებენ და შეგვიძლია წერილობით გამოვითხოვოთ.

დასკვნის მიხედვით, პედაგოგების ან სკოლის დირექციის მიმართ რა სახის რეაგირება მოხდება, ამაზე უწყებაში არ საუბრობენ.

მესამე და მეხუთე სკოლის დირექტორები კი ამბობენ, რომ არც დასკვნა მიუღიათ და არც რაიმე სახის შეტყობინება.

„როდესაც იკვლევდნენ, მე თვითონაც მომიწია ჩასვლა სამინისტროში გამოკითხვაზე და მორჩა, მას შემდეგ შეტყობინება არ მოსულა. რა ხდება, არ ვიცი“, – გვითხრა ახალციხის მესამე საჯარო სკოლის დირექტორმა სუსანა აკოპოვმა.

ახალციხის მეხუთე და მესამე საჯარო სკოლებში, ოთხი თვის წინ, „ანბანის გაცილების“ ღონისძიებაზე, პირველკლასელებს წითელი ყელსახვევებით მიაღებინეს მონაწილეობა, რამაც საზოგადოებას საბჭოთა პიონერები გაახსენა. სკოლების მიერ საბჭოთა სიმბოლიკების გამოყენებაზე საუბრობდნენ იურისტებიც.

ორივე სკოლაში მოკვლევა განათლების აუდიტის სამსახურმა დაიწყო. თუმცა, ახალციხე ერთადერთი არ ყოფილა, სადაც წითელი ყელსახვევებით პირველკლასელებმა ღონისძიება გამართეს. მსგავსი ფაქტი დაფიქსირდა გურიის ერთ–ერთ სკოლაშიც. მაშინ სამინისტრომ ყველა სკოლას მოუწოდა, მსგავსი ფაქტისაგან თავი შეეკავებინათ, თუმცა გუშინ, 16 სექტემბერს, ახალი სასწავლო წლის დაწყებასთან დაკავშირებით, ქობულეთის მესამე საჯარო სკოლის პირველკლასელებს, ბიჭებს ლურჯი, ხოლო გოგონებს წითელი ყელსახვევები დაახვედრა დამრიგებელმა და ღონისძიებაზეც ასე გამოიყვანა.

ამავე თემაზე ნახეთ:

‘ბოლომდე ჩავყვებით ამ ამბავს’ – განათლების სამინისტრო წითელ ყელსახვევებზე

[ლუბა გიორგაძე, ახალციხე]