სკოლიდან გათავისუფლებული მასწავლებლის საჩივარი არ დაკმაყოფილდა

მოსამართლე მარიკა ჩიტაშვილმა ხუციშვილის საჩივრის გადაწყევტილებაზე სარეზოლუციო ნაწილი დღეს, 24 სექტემბერს გამოაცხადა. მასწავლებლის საჩივარი, სამსახურში აღდგენასა და განაცდურის ანაზღაურებაზე, არ დაკმაყოფილდა.

„მიმაჩნია, რომ ნამდვილად მოხდა ბავშვზე მასწავლებლის მხრიდან შეურაცხყოფა და დირექციამაც შესაბამისი რეაგირება მოახდინა. სასამართლო განხილვების დროს, საპირისპიროდ არგუმენტირებული მტკიცებულება, რომ მსგავსი ფაქტი არ მომხდარა, არ მომისმენია“, – განაცხადა გადაწყვეტილების გამოცხადებისას მოსამართლემ.

მოსარჩელე მხარისთვის გადაწყვეტილება მოულოდნელი იყო.

„ვფიქრობდით, რომ დაკმაყოფილდებოდა სარჩელი, რადგან ამის ყველა მტკიცებულება გვქონდა, მაგრამ მოსამართლემ უსამართლო გადაწყვეტილება მიიღო. ვერ ვხვდები გასაჩივრების აზრს, საქართველოში ყველა მოსამართლე ერთნაირია“, – გვითხრა სხდომის დასრულების შემდეგ თემურ ხუციშვილმა.

თემურ ხუციშვილს სკოლა, მეხუთე კლასში მომხდარი ინციდენტის გამო, 2018 წლის 28 დეკემბერს დაატოვებინეს. შინაგან საქმეთა სამინისტრომ გამოძიება სსკ–ს 126 მუხლის „ა“ ქვეპუნქტით დაიწყო, რაც წინასწარი შეცნობით არასრულწლოვანის მიმართ ძალადობას გულისხმობს. თუმცა იმის გამო, რომ საქმე დანაშაულის ნიშნებს არ შეიცავდა, ძიება შეწყდა, რის შემდეგაც ხუციშვილმა, სამსახურში აღდგენისა და განაცდურის ანაზრაურების მოთხოვნით, სკოლის წინააღმდეგ სასამართლოს მიმართა.

[ლუბა გიორგაძე, ახალციხე]