ახალციხის ციხიდან გათავისუფლებული თანამშრომლის სარჩელი არ დაკმაყოფილდა

გათბობა–გაგრილების სისტემის სპეციალისტი, ვეფხვია სამსონიძე სამსახურში აღდგენასა და განაცდურის ანაზღაურებას ითხოვდა. 21 აგვისტოს გამართულ სხდომაზე კი მოსამართლე გიორგი ლონდარიძემ სარჩელი არ დააკმაყოფილა. საქმე ახალციხის ციხის სასარგებლოდ გადაწყდა.

როგორც სამსონიძე ამბობს, მოსამართლეს თავისი გადაწყვეტილება არ განუმარტავს: „არ ვიცი რატომ მიიღო ასეთი გადაწყვეტილება მოსამართლემ, არ განმარტა და არ ახსნა. მინდა რომ გავასაჩივრო, ვნახოთ რა იქნება. ჩემი სიმართლისთვის ბრძოლას გავაგრძელებ“, – ამბობს სამსონიძე.

მიმდინარე წელს, ახალციხის ციხეზე, რეორგანიზაციის შედეგად, გაუქმდა შვიდი შტატი, ექვსი თანამშრომელი კი სამსახურიდან გაათავისუფლეს. ექვსიდან ორმა, სამსახურში აღდგენის და განაცდურის ანაზღაურების მოთხოვნით, სასამართლოს მიმართა. მათ შორისაა ვეფხვია სამსონიძე და ყოფილი საქმის მწარმოებლი მაია მაისურაძე, რომლის შტატიც გააუქმეს.

მოგვიანებით, 10 მაისს, ახალციხის ციხის ადმინისტრაციამ გათავისუფლებული ექვსი თანამშრომლიდან ხუთს, ტურისტული სეზონის დასრულებამდე, სამსახურში დაბრუნება შესთავაზა. აქედან სამსახურში მხოლოდ ოთხი მათგანი დაბრუნდა.

[მარიამ ბარძიმაძე, ახალციხე]