აქვს თუ არა ‘ბორჯომს’ ზედა ლიგაში ასვლის შანსი

ქედის ცენტრალურ სტადიონზე, 23 სექტემბერს გულშემატკივარმა სამი გატანილი გოლი იხილა. სამივე მათგანი მასპინძელი გუნდის წევრებმა გაიტანეს, რითაც ქედის ‘ბეთლემმა’ სატურნირო ცხრილში ერთი ადგილით წინ წაიწია და მერვე ადგილზე გადაინაცვლა.

საფეხბურთო კლუბი „ბორჯომი“ კი მარცხის შემდეგ, სატურნირო ცხრილის მეექვსე ადგილს იკავებს.

“ბორჯომის” მთავარი მწვრთნელი კობა თედიაშვილი, გუნდის მარცხს არასრულ შემადგენლობას უკავშირებს.

„ძალიან შესუსტებული შემადგენლობით ვიყავით. ძირითადიდან ოთხი ფეხბურთელი გვაკლდა, თან მატჩი სტუმრად იყო, გუნდი დემოტივირებულია, თუმცა ძალებს აღვიდგენთ აუცილებლად.“ - ამბობს კობა.

რაც შეეხება ზედა ლიგაში ასპარეზობის შანსს, თეორიულად შანსი არსებობს, თუმცა ეს დამოკიდებულია, როგორც კლუბის კარგ თამაშზე, ასევე სხვა კლუბების მატჩების შედეგებზეც. კობა თედიაშვილის თქმით, გუნდის ზედა ლიგაში ასვლის შანსი ძალიან დაბალია.

„ალბათ 90%–ით შეუძლებელია ზედა ლიგაში ასვლა, მაგრამ ყველანაირად ვეცდებით, რომ ამის გამო სხვა თამაშები არ ჩავაგდოთ და მომავალი სეზონისთვის კარგად მოვემზადოთ“, - განაცხადა კობა თედიაშვილმა.

ამჟამად მესამე ლიგაში ‘ბორჯომი’ 11 მოგებით, 12 წაგებითა და 2 ფრით, 10 გუნდიდან მე-6 ადგილს იკავებს სატურნირო ცხრილში. წინ კიდევ 11 ტურია.

[რობი ზარიძე, ბორჯომი]