ახალციხის ციხის დირექტორი: 'ტურიზმის ადმინისტრაციის სტატისტიკაში ცდომილებაა'

სამცხე–ჯავახეთში, უცხოელ ვიზიტორთა რაოდენობის სტატისტიკა „სამხრეთის კარიბჭემ“ ტურიზმის ეროვნული ადმინისტრაციისგან გამოითხოვა. მათი ინფორმაციით, 2019 წლის იანვარ-მარტის პერიოდში, ახალციხის ციხეს 12 791 ვიზიტორი ესტუმრა, გასულ წლის ამავე პერიოდში კი, 29 594.

მოწოდებულ სტატისტიკურ მაჩვენებელს ახალციხის ციხის დირექტორი, დავით ტაბატაძე ეხმაურება. მისი თქმით, ეროვნული ადმინისტრაციის მიერ მოწოდებულ მონაცემებში ცდომილებაა: „მიმდინარე წლის იანვარ-მარტის პერიოდში ციხეს 5 406 უცხოელი ვიზიტორი ეწვია, მაშინ, როცა შარშან იმავე პერიოდში, 5 629 უცხოენოვანი ვიზიტორი შემოვიდა“, – განმარტავს დავით ტაბატაძე.

ტურიზმის ეროვნულ ადმინისტრაციაში ამბობენ, რომ მონაცემი, რომელიც „სამხრეთის კარიბჭეს“ მიაწოდეს საქსტატს ეკუთვნის. ამიტომ მასში ცდომილების არსებობა შესაძლებელია: „ყველა სტატისტიკას აქვს ცდომილების პროცენტი, მე რატომ უნდა მეთქვა ცდომილების შესახებ? ვიზიტორებს როდესაც ვეკითხებით რა ადგილები მოინახულა ახალციხეში, რთულად იხსენებენ ადგილებს, ამას აღწერს საქსტატი, ამ სტატისტიკას აქვს ცდომილება“, - ამბობს ტურიზმის ეროვნული ადმინისტრაციის კვლევებისა და დაგეგმვის სამმართველოს უფროსი, გიორგი ბრეგაძე.

მისივე თქმით, თუ რა ობიექქტები მოინახულეს ვიზიტორებმა საქართველოში, ამას კითხვარის საშუალებით ადგენენ: „საზღვრიდან გასვლისას, ვიზიტორებს ვეკითხებით რომელი ადგილები მოინახულეს და მერე ხდება ამის ჩაშლა ადგილების მიხედვით“.



[ავთო ინასარიძე, ახალციხე]