'ნინოწმინდაში სექსუალური შევიწროების ბევრი ფაქტია' - ნარინე გინოსიანი

შეხვედრა დღეს, 22 აგვისტოს, ახალციხის დემოკრატიული ჩართულობის ცენტრში გაიმართა. ნარინე გინოსიანმა, რომელიც ნინოწმინდა-ახალქალაქის მაჟორიტარ დეპუტატს ენზელ მკოიანს სექსუალურ შევიწროებაში დებს ბრალს, მესამე სექტორს ნინოწმინდაში არსებული სიტუაცია გააცნო.

„ძალიან ხშირად ხდება ქალზე ძალადობა ნინოწმინდის სოფლებში. აქ, ძირითადად, ეთნიკურად სომეხი მოსახლეობა ცხოვრობს. კაცებს სხვანაირი წარმოდგენა აქვთ ქალთა უფლებებზე და ფიქრობენ, რომ ქალი მხოლოდ ბაღსა და სკოლაში უნდა მუშაობდეს ანუ იქ, სადაც მხოლოდ ქალები არიან. ვცდილობდით ქალების დახმარებას, ამიტომ სოფლებში მოხალისეები გვყავდა, რომლებსაც ხელფასს ვუხდიდით, რომ შეეკრიბათ ქალები და შეხვედრები ჩაეტარებინათ, მაგრამ ქალებმა მალევე თქვეს უარი ასეთ შეხვედრებზე“, - ამბობს ნარინე გინოსიანი.

მისივე თქმით, ასეთი სექსუალური შევიწროების მსხვერპლი იგი თავად იყო, ამიტომ გადაწყვიტა, რომ მსგავს თემებზე ხმამაღლა ლაპარაკი დაეწყო: „იყო შემთხვევები, რომ ქალმა უარი თქვა მისთვის მიუღებელ წინადადებაზე და სამსახურიდან გაათავისუფლეს. ასევე, მისი დაშინება ხდებოდა. მაგალითად, როცა ჩვენ ვხსნიდით საბავშვო ბაღს, ბევრი შემთხვევა იყო, როცა ცდილობდნენ ჩემი ქმრითა და ოჯახით ზეგავლენა მოეხდინათ ჩემზე“, – ამბობს გინოსიანი.

მან ასევე ბოლოს მომხდარი გახმაურებული შემთხვევა გაიხსენა, რომელიც მის მიმართ მაჟორიტარი დეპუტატის მხრიდან სექსუალური შევიწროებას ეხებოდა.

შეხვედრაზე, გინოსიანის ადვოკატმა მირიან ნიკოლაძემ საქმის მასალებზე ისაუბრა და გამოიძიებას ზღაპარი უწოდა.

"მასალებიდან ირკვევა, რომ ბენზინის დანახარჯებზე აკეთებდნენ აქცენტებს. გადაამოწმეს ნინოწმინდა–ახალციხე–ახალქალაქის ბენზინ გასამართი სადგურები. შეადარეს ეს ლიმიტირებული ბარათები, რომლებიც მას ჰქონდა, იწყებდნენ იმის დადგენას, რამდენი ლიტრით მეტი ჩაასხა ნარინემ ბენზინი, რომ რაღაც 10 ლიტრი მაინც სადმე ამოეგდოთ რომ ზედმეტი დანახარჯი, არამიზნობრივად გაიხარჯა“, – განმარტა ადვოკატმა.

დღევანდელ შეხვედრას ახალციხეში მოქმედი არასამთავრობო ორგანიზაციების წარმომადგენლები დაესწრნენ.



[მარიამ ბარძიმაძე, ახალციხე]