ბორჯომში საპატიო მოქალაქეები დაასახელეს

საპატიო ბორჯომელები ადგილობრივმა თვითმმართველობამ შეარჩია. მათი ინფორმაციით, თამარ ლიჩელი და შალვა გოგოლძე წესდების მიხედვით, რამდენიმე კანდიდატს შორის შეირჩნენ.

„თათა ლიჩელმა ბორჯომში დააარსა „თენგიზ ამირეჯიბის სახელობის კონკურსი“, რომელიც წელს უკვე მეხუთედ გაიმართა. ჩვენ ვთვლით, რომ ლიანა ისაკაძის შემდეგ, მან ბორჯომში ყველაზე კარგ ღონისძიებას ჩაუყარა საფუძველი, ამიტომ ჩავთვალეთ, რომ თათა უნდა ყოფილიყო საპატიო ბორჯომელი. რაც შეეხება შალვა გოგოლაძეს, ისიც ბორჯომელია და სამინისტროში მუშაობს, ყოველთვის მზად არის, რომ ბორჯომის გვერდით იყოს“, - ამბობს ბორჯომის მერიის კულტურის სამსახურის უფროსი მარინა ხუჯაძე.

პიანისტი თათა (თამარ) ლიჩელი სხვადასხვა ეროვული და საერთაშორისო კონკურსის ლაურეატია. იგი აქტიურ საშემსრულებლო საქმიანობას ეწევა. კონცერტებს მართავს საქართველოსა და უცხოეთში. არის „კლასიკური მუსიკის განვითარების ფონდის“დირექტორი.

„ეს ჩემთვის ერთ-ერთი ყველაზე მნიშვნელოვანი ჯილდოა, რაც კი ოდესმე მიმიღია. თემგიზ ამირეჯიბის სახელობის ფესტივალი, რომელსაც უკვე წლებია ვატარებ ბორჯომში, ჩემი მუსიკალური ცხოვრების ერთ-ერთი მნიშვნელოვანი მომენტი გახდა. ყველა დიდი და ცნობილი მუსიკოსი სიამოვნებით ჩამოდის აქ“, - ამბობს ლიჩელი.

რაც შეეხება მეორე საპატიო მოქალაქეს, შალვა გოგოლაძე საქართველოს განათლების, მეცნიერების, კულტურისა და სპორტის მინისტრის მოადგილე, სამცხე-ჯავახეთის კრივის რეგიონული ფედერაციის პრეზიდენტი და საქართველოს კრივის ეროვნული ფედერაციის ვიცე პრეზიდენტია.

„ალბათ არ არსებობს ამაზე მეტი ჯილდო, რასაც ჰქვია შენი ქალაქის მოქალაქეობა. მადლობა ამ დიდი პატივისთვის. ეს არის პატივი და დიდი პასუხისმგებლობაც. შენი ქალაქის, ქვეყნისა და ოჯახის წინაშე“, - აღნიშნა შალვა გოგოლაძემ.

ბორჯომობა 2019 გალა კონცერტით გრძელდება. სცენაზე ესტრადის მომღერლების მონაწილეობით კონცერტი დაიწყო.





[რობი ზარიძე, თაკო ფეიქრიშვილი, ბორჯომი]