TI: 'მუნიციპალიტეტები დაცული ტერიტორიებიდან შემოსავალს არ იღებენ'

კვევის მიხედვით, სამცხე-ჯავახეთში 12 დაცული ტერიტორიაა, მათი ნაწილი შემოსავლების მიმღები არ არის, ნაწილისგან მიღებული თანხა კი მუნიციპალიტეტში არ რჩება.

2017-დან 2019 წლის მაისამდე, რეგიონში არსებულ დაცულ ტერიტორიებს სულ 139 406 ვიზიტორი ესტუმრა, მიღებულმა შემოსავალმა კი 204 462 ლარი შეადგინა. თუმცა თანხა სახელმწიფო ბიუჯეტში შევიდა და არა თვითმმართველობების.

არასამთავრობო ორგანიზაცია „საერთაშორისო გამჭვირვალობა-საქართველოს“(TI) ინფორმაციით, მუნიციპალიტეტების ტერიტორიაზე, სახელმწიფო თვითმმართველობაზე მეტ ქონებას ფლობს, - „მუნიციპალიტეტები მოკლებულნი არიან შესაძლებლობას, მათსავე ტერიტორიაზე არსებული ქონება გამოიყენონ შემოსავლების გასაზრდელად“.

მათივე თქმით, საქართველოში სულ 87 დაცული ტერიტორიაა, მათგან შემოსავლების მიმღები 13-ია, ხოლო ტურისტული ინფრასტრუქტურა 16-შია მოწყობილი.

2017 - დან 2019 წლის მაისის ჩათვლით, საქართველოს დაცულ ტერიტორიებს 1 995 554 ვიზიტორი ეწვია, მიღებულმა შემოსავალმა კი 13 634 498 ლარი შეადგინა.

„საერთაშორისო გამჭვირვალობა - საქართველოს” მოკვლევაში ადგილობრივი თვითმმართველობის დეცენტრალიზაციის ახალი სტრატეგიის ფარგლებში რეკომენდაციებსაც გასცემს:

> მაქსიმალურად ბევრ დაცულ ტერიტორიაზე მოეწყოს ტურისტული ინფრასტრუქტურა, რათა ტურისტებისა და ვიზიტორთა მხრიდან მისაღები შემოსავლის ოდენობა მუდმივად გაიზარდოს.

> აუცილებელია, ადგილობრივი თვითმმართველობის დეცენტრალიზაციის ახალი სტრატეგიის განხილვის ფარგლებში, საქართველოს ხელისუფლებამ იმსჯელოს, დაცული ტერიტორიებიდან მისაღები შემოსავლების ცენტრალურ და ადგილობრივ ბიუჯეტებს შორის განაწილებაზე, გრძელვადიან პერიოდში კი დაცული ტერიტორიების გარკვეული კატეგორიების (მაგალითად, მარტვილის და ოკაცეს კანიონები) მუნიციპალურ საკუთრებაში გადაცემაზე. დაცული ტერიტორიებიდან მისაღები შემოსავლების გადანაწილება ცენტრალურ და ადგილობრივ ბიუჯეტებს შორის გაზრდის მუნიციპალიტეტების შემოსავლებს და ამასთან, ხელს შეუწყობს თვითმმართველობების დაინტერესებას, იზრუნონ ტურიზმის
განვითარებაზე.





[ავთო ინასარიძე, ახალციხე]