დასუფთავების აქციას ახალციხეშიც შეუერთდნენ

20-21-22 სექტემბერს საქართველოში აქცია „დავასუფთაოთ საქართველო - დავასუფთაოთ მსოფლიო“ ტარდება. რომლის ფარგლებშიც დღეს ახალციხის ხელოვნური ტბის მიმდებარე ტერიტორია ნარჩენებისგან დაასუფთავეს.

დასუფთავების აქციაში მონაწილეობა ახალციხის მუნიციპალიტეტის საკრებულოს, გამგეობის, საჯარო დაწესებულებებისა და არასამთავრობო ორგანიზაციების წარმომადგენლებმა მიიღეს.

„უკეთესი იქნება, რომ მსგავსი აქციები წელიწადში ერთხელ კი არა, უფრო ხშირად ტარდებოდეს. როცა ჩვენ თვითონ დავასუფთავებთ ჩვენს ქალაქს, მეტად გავუფრთხილდებით და აღარ დავანაგვიანებთ. უბრალოდ ხალხი უნდა მივიდეს იმ შეგნებამდე, რომ გარემო არ დააბინძუროს“, - ამბობს ახალციხის მუნიციპალიტეტის საკრებულოს თავმჯდომარის მოადგილე მალხაზ ასპანიძე.

დასუფთავების აქცია "დავასუფთაოთ საქართველო – საზოგადოების ცნობიერების ამაღლება და მისი ჩართვა მყარი საყოფაცხოვრებო ნარჩენების მართვის გაუმჯობესების პროცესში“ პროექტის ფარგლებში ტარდება, რომელსაც ახორციელებს არასამთავრობო ორგანიზაციათა კონსორციუმი – "საქართველოს მწვანეთა მოძრაობა დედამიწის მეგობრები/საქართველო", მდგრადი განვითარების კავშირი "ეკოხედვა" და საქართველოს ბუნების მკვლევართა კავშირი "ორქისი", შვედეთის საერთაშორისო განვითარების სააგენტოს (Sida) მხარდაჭერით.

„დასუფთავების აქციები მთელი რეგიონის მასშტაბით ტარდება, ხვალ დაგეგმილი გვაქვს აბასთუმნის პარკის და მიმდებარე ტერიტორიის დასუფთავება. ყველას აქვს შესაძლებლობა საკუთარი ქუჩა, ეზო და სხვა დაბინძურებული ტერიტორია დაასუფთაოს“, - ამბობს პროექტის კოორდინატორი ხათუნა ხმალაძე.

[თამარ თოთაძე, ახალციხე]