ცხელი ტურისტული სეზონი და მოუმზადებელი კურორტი

დღეს, 19 ივნისს „სამხრეთის კარიბჭის“ ჟურნალისტებსა და ებრაელთა 15–კაციან ველოსიპედისტების ჯგუფს, დაახლოებით, 30–45 წუთი მოუწია ლოდინი პატარა მიტარბისკენ მიმავალ გზაზე, სადაც კლდოვანი მასა იყო ჩამოწოლილი და გზა იყო ჩახერგილი. ადგილზე მუშაობდა ტექნიკა.

ექსტრემის მოყვარული ველოსიპედისტების ჯგუფი ბაკურიანიდან მოდიოდა, თუმცა ასეთ ექსტრემს – ჩამოშლილ კლდესა და გადაკეტილ გზას, ნამდვილად არ ელოდნენ.

„ოთხი–ხუთი დღეა, რაც კლდე ჩამოიშალა. შევატყობინე მერიას, გამოუშვეს ტრაქტორი და მუშაობს უკვე“, – გვითხრა სოფელ პატარა მიტარბის მკვიდრმა გიორგი ზედგინიძემ.

მისივე თქმით, წვიმების დროს კლდის ჩამოშლის ალბათობა უფრო დიდია. საშიშროებას ისიც ამძაფრებს, რომ გზა ვიწროა, ამასთანავე – ძნელად სავალი.

როგორც ბორჯომის მუნიციპალიტეტის მერიის ინფრასტრუქტურის, არქიტექტურისა და ზედამხედველობის სამსახურის უფროსმა გიორგი ყიფიანმა განაცხადა, ამჟამად სოფელ პატარა მიტარბის გზაზე მუშაობს ტექნიკა. საავტომობილო გზის დაგება კი, წელს აღნიშნულ მონაკვეთზე არ იგეგმება.

საშიში მონაკვეთი, სადაც ერთ მხარეს ხევია, მეორე მხარეს კი ნახევრად შლადი მთა, დაახლოებით სამასი მეტრია. სოფელი პატარა მიტარბი სოფელ ტიმოთესუბნის გზაზეა. ტიმოთესუბნამდე კარგი საავტომობილო გზაა, შემდეგ კი 11–კილომეტრიანი გზის მონაკვეთი სავალალო მდგომარეობაშია.

[გულო კოხოძე, ბორჯომი]