ტოლოშის მცხოვრებლებს აწყვიტის გზის რეაბილიტაციისას სარწყავი არხი გაუუქმეს

სოფელ ტოლოშის მკვიდრი ელდარ ზაზაძე ამბობს, რომ სარწყავი არხი, რომლითაც 28 წლის განმავლობაში სარგებლობდა, აწყვიტასთან დამაკავშირებელ გზაზე იყო გაყვანილი და მდინარესთან შეერთებული. ამ წყალსადენით კი, კიდევ ოთხი ოჯახი სარგებლობდა.

ზაზაძე ამბობს, რომ რამდენიმე კვირის წინ, აწყვიტის გზაზე დაწყებული სამუშაოების შემდეგ, არხი გაუუქმეს და ნათესებს ვეღარ რწყავს: „მეც და სამეზობლოს, გრუნტი გვქონდა გადაჭრილი და ასე ვსარგებლობდით სარწყავით. ახალ პროექტში არ დაიტანეს არხი და დავრჩით ასე. სხვა ალტერნატივა არ მაქვს, რომ წყალი შევიყვანო. ნათესები მიხმება“.

ელდარ ზაზაძე კომპანიისგან ექვსი მეტრის, 150 მმ–იან მილის მოწყობას ითხოვს: „იმხელა ტერიტორიიაა, რომ ეს მილი საკმარისი იქნება“.

ამ ტერიტორიაზე ადგილობრივებს დაახლოებით 15 –15 მეასედი სათესი ნაკვეთები აქვთ. არხით სარგებლობდა ადგილობრივი ემზარ დავლაშერიძეც.

„ყოველ წელს ამ არხით ვასარწყავიანებ ნაკვეთებს. მითხრეს გააუქმესო, მაგრამ რაც გზის რეაბილიტაცია დაიწყო, მე სოფელში არ ვყოფილვარ და არც არავისთვის მიმიმართავს არხი გაგვიკეთეთო“, – გვეუბნება ემზარ დავლაშერიძე.

აწყვიტისა და ტოლოშის ადმინისტრაციული ერთეულის წარმომადგენლები, „სამხრეთის კარიბჭესთან“ აცხადებენ, რომ, გზის დაპროექტებისას, ადგილზე არ ყოფილან და არც სარწყავი არხის შესახებ იციან რამე.

აწყვიტის გზის სამუშაოებს ტენდერში გამარჯვებული კომპანია შპს „ასტორია“ ახორციელებს. მისი ხელმძღვანელის მალხაზ მანველიშვილის თქმით, საკითხის შესახებ იცის და ადგილზე შეისწავლის.

„მე ადგილობრივებს დავპირდი, რომ ხვალ ავალ, 20 ივნისს და ამ ტერიტორიას ვნახავ. თუ შესაძლებლობა იქნება, გზაზე არხსაც გავიყვანთ და სარწყავი წყალი ექნებათ. როგორც საჭიროა, ისე გავაკეთებთ ყველაფერს“, – ამბობს მალხაზ მანველიშვილი.

აწყვიტაში გზის სარეაბილიტაციო სამუშაოები რამდენიმე კვირის წინ დაიწყო. აქ სამ კილომეტრამდე გზა უნდა მოასფალტდეს. ამ დროისათვის გზის მოხრეშვის სამუშაოები მიმდინარეობს.



[ლუბა გიორგაძე, ასპინძა]