მკვლელობისა და ძარცვის ბრალდებით დაკავებულებს აღკვეთის ღონსძიებად პატიმრობა შეეფარდათ

ახალციხის რაიონულ სასამართლოში აღკვეთის ღონისძების შეფარდებაზე დღეს, 14 ივნისს იმსჯელეს. იმის გამო, რომ ერთ–ერთი ბრალდებული არასრულწლოვანია, მოსამართლე ნათია მერაბიშვილმა სხდომა დახურა.

დაკავებულის ნ.მ–ს ადვოკატი ზურაბ როსტიაშვილი ამბობს, რომ გადაწყვეტილებას გაასაჩივრებენ.

"ჩემი დაცვის ქვეშ მყოფს სხეულზე დაზიანებები აღენიშნება, რომელიც გარდაცვლილმა მიაყენა. ნაჯახი ჰქონდა დაზარალებულს და ის იწევდა საჩხუბრად. ჩხუბობდნენ და ამ ჭიდაობაში გარდაიცვალა. ნ.მ–ს რომ არ ეყოჩაღა დაზარალებულის მაგივრად შეიძლება ეს მომკვდარიყო“,–ამბობს ადვოკატი.

12 ივნისს, გამთენიისას, დაბა წაღვერის მიმდებარედ, 1960 წელს დაბადებულ აკაკი პაპიძეს ურთიერთშელაპარაკების შემდეგ, სამმა პირმა კუთვნილი ავტომობილი დაუზიანა, ერთ-ერთმა მათგანმა კი თავის არეში სიცოცხლისთვის საშიში ჭრილობა მიაყენა. აკაკი პაპიძე ადგილზე გარდაიცვალა, ხოლო თავდამსხმელები შემთხვევის ადგილიდან მიიმალნენ.

ნ.მ.-ს ბრალად ედება განზრახ მკვლელობა, ხოლო შ.ა. და კ.შ. წინასწარი შეთანხმებით ჯგუფის მიერ ძალადობის გამოყენების მუქარით ჩადენილ ძარცვაში არიან ბრალდებული. დაკავებულები ჩადენილ დანაშაულს აღიარებენ.
სამი ბრალდებულიდან ერთი, სამცხე–ჯავახეთის ერთ–ერთი მუნიციპალიტეტის საკრებულოს დეპუტატის შვილია. იგი ავტოგასამართი სადგურის ძარცვისა და წაღვერთან მოკლული კაცის ავტომობილის დაზიანებისათვისაა დაკავებული.

[მარიამ ბარძიმაძე, ახალციხე]