წინასწარი პატიმრობა და გირაო – აწყურში მომხდარი ძარცვის საქმეზე სასამართლომ იმსჯელა

აღკვეთის ღონისძიების შეფარდებაზე ახალციხის რაიონულ სასამართლოში დღეს, რვა თებერვალს იმსჯელეს. სხდომა დახურული იყო. მოსამართლე ლუიზა თოდუას გადაწყვეტილებით, ბრალდებულებს, 2003 წელს დაბადებულ ლ.ჯ–ს წინასწარი პატიმრობა, 2004 წელს დაბადებულ ლ.წ–ს კი გირაო 3 000 ლარის ოდენობით შეეფარდა და იგი სასამართლოდან გაათავისუფლეს.

„15 წლისაა, თბილისელები ვართ. არ ვიცოდი აქეთ თუ იყო წამოსული. რას ვიფიქრებდი. აიყოლიეს ჩემი შვილი“, – ამბობს ლ.წ–ს მშობელი.

ახალციხეში, სოფელ აწყურში მდებარე მაღაზიაში მძარცველები, ექვს თებერვალს შევიდნენ. შემთხვევა დაახლოებით 05:30 საათზე მოხდა.
ახალციხის რაიონული სამმართველოს თანამშრომლებმა, ორი არასრულწლოვანი - 2004 წელს დაბადებული ლ.წ. და 2003 წელს დაბადებული ლ.ჯ., წინასწარი შეთანხმებით ჯგუფის მიერ ჩადენილი ძარცვის ბრალდებით, ახალციხის მუნიციპალიტეტში დააკავეს.

დანაშაული 4-დან 8 წლამდე ვადით თავისუფლების აღკვეთას ითვალისწინებს.

გამოძიებით დადგინდა, რომ ბრალდებულები ახალციხის მუნიციპალიტეტის სოფელ აწყურში მდებარე სასურსათო მაღაზიაში უკანონოდ შეიჭრნენ, სავაჭრო ობიექტის მეპატრონეს გარკვეული ოდენობის თანხა და პროდუქცია წაართვეს, რის შემდეგაც შემთხვევის ადგილიდან მიიმალნენ.

პოლიციამ ორივე არასრულწლოვანი მომხდარიდან მალევე, ცხელ კვალზე დააკავა. ნივთმტკიცებად ამოღებულია ნაძარცვი პროდუქცია და თანხა.

გამოძიება საქართველოს სსკ-ის 178-ე მუხლის მე-2 ნაწილის "ბ" ქვეპუნქტით, ასევე, ამავე მუხლის მე-3 ნაწილის "ა" და "ბ" ქვეპუნქტებით მიმდინარეობს, რაც არაერთგზის, წინასწარი შეთანხმებით ჯგუფის მიერ ძარცვას გულისხმობს.


[მარიამ ბარძიმაძე, ახალციხე]