სამცხე-ჯავახეთი, ქვეყნის 13 რეგიონს შორის, ტყის საფარით მერვე ადგილზეა. რეგიონში ტყით 170 ათასი ჰექტარია დაფარული.
ამავდროულად, სამცხე-ჯავახეთი ქვეყანაში პირველ ადგილზეა ხე-ტყის კლებით, 2001-2018 წლებში აქ 3200 ჰექტარი ტყე გაქრა.
ტყის მასივის კლება მუნიციპალიტეტების მიხედვით
რეგიონში ყველაზე ნაკლები ტყე ახალქალაქისა და ნინოწმინდის მუნიციპალიტეტშია. ჯამურად აქ ტყით 6 528 ჰექტარია დაფარული, ბოლო 17 წელიწადში კი 105 ჰექტარი დაიკარგა.
14 737 ჰექტარია ასპინძაში, საფარი კი, იგივე პერიოდში, 34 ჰექტრით არის შემცირებული.
ახალციხეში ტყით 39 517 ჰექტარია დაფარული, კლება 460 ჰექტარია.
34 204 ჰექტარი უკავია ტყეს ადიგენში, გამქრალი ტყის რაოდენობა კი 1000 ჰექტარს მოიცავს.
ამჟამად 74 000 ჰექტარია ბორჯომში, 2001-2018 წლებში კი 1600 ჰექტარი გაქრა.
გასული 17 წლის განმავლობაში, ხე-ტყის კარგვა გამორჩეულად დიდი იყო 2004 წელს. Forest Watch-ის ინტერაქტიური რუკის მიხედვით, ამ წელს ექვსივე მუნიციპალიტეტის ტერიტორიაზე გამქრალია 2000 ჰექტარი, აქედან 1231 ჰა სატყეო ჭრების (კომერციული, სანიტარული, სოციალური) შედეგად, სასოფლო სამეურნეო მიზნით 1 ჰექტარი, ხანძრის შედეგად კი 54 ჰექტარი განადგურდა.
კლებასთან ერთად, სამცხე-ჯავახეთს 2001-2012 წლებში 780 ჰექტარი ტყე დაემატა. ახალციხის სატყეო უბნის უფროსი მეტყევე, სტალბერ ყურმაშვილი ამბობს, რომ 2004 და შემდგომ წლებში ტყის დიდი რაოდენობით გაქრობის შესახებ ინფორმაცია არ აქვს და ბუნებრივ მატებაზე საუბრობს: „ხე-ტყე ძირითადად 1990-იან წლებში, განუკითხაობის პერიოდში იჩეხებოდა. თქვენ მიერ დასახელებული მონაცემები ჩემთვის ცნობილი არაა. მეტიც, ანდრიაწმინდაში, ანდაში, ურაველში, აბის დასახლებაში და კიდევ სხვა რამდენიმე სოფელში ტყე დასახლებულ ადგილებამდეა ჩამოსული და ყოველწლიურად მატულობს“.
Forest Watch-ის მონაცემებს არც გარემოს დაცვისა და სოფლის მეურნეობის სამინისტროს ბიომრავალფეროვნებისა და სატყეო დეპარტამენტის უფროსი, კარლო ამირგულაშვილი ენდობა: „3200 ჰექტარი ძალიან დიდი ციფრია, ეს მონაცემები ჯერ სამინისტროს არ გადმოსცემია და მისი სანდოობა საეჭვოა“.
Global Forest Watch-ის პროექტის ეროვნული კოორდინატორის, ეკატერინა ნაკაშიძის განმარტებით, სატელიტით გადაღებული სურათები უტყუარ ინფორმაციას იძლევა: „სატელიტი ტყის მასივს 30 მეტრიანი ლანცატის გამოსახულებით აღიქვამს, თუ თავდაპირველად იყო გამოსახულება, რომელიც შემდგომი დაკვირვებისას 30%-ით შემცირდა, ვამბობთ, რომ ტყე შემცირდა“.
ინტერაქტიური რუკის სრული მონაცემები შეგიძლიათ იხილოთ
აქ გაერთიანებული ერების ორგანიზაციის ინიციატივით, „გაეროს გარემოს დაცვითი პროგრამა“ ყოველი წლის 5 ივნისს უძღვნის გარემოსდაცვით ერთ-ერთ პრობლემას და მიზნად ისახავს გარემოს მდგრადი განვითარებისათვის ხელშეწყობას და გარემოს შენარჩუნებისა და გაუმჯობესებისათვის ბრძოლაში საზოგადოების აქტიურ ჩართვას. წლევანდელი გარემოს დაცვის საერთაშორისო დღის თემაა – „ჩვენ ერთად შევძლებთ შევამციროთ ჰაერის დაბინძურება“.
აბასთუმანი, ფოტო: Global Forest Watch ვარდისფერი გამქრალ ტყის მასივებს აღნიშნავს ადიგენი, ფოტო: Global Forest Watch ვარდისფერი გამქრალ ტყის მასივებს აღნიშნავს აწყური, ფოტო: Global Forest Watch ვარდისფერი გამქრალ ტყის მასივებს აღნიშნავს ბორჯომი, ფოტო: Global Forest Watch ვარდისფერი გამქრალ ტყის მასივებს აღნიშნავს [ავთო ინასარიძე, ახალციხე]