ახალციხის ციხეზე რეინჯერები დააჯილდოვეს[ფოტო]

დღეს, 26 მაისს საქართველოს დამოუკიდებლობის დღისადმი მიძღვნილ ღონისძიებაზე, ქობულეთის დაცული ტერიტორიების დაცვის განყოფილების უფროსი თეიმურაზ ქათამაძე, პირველი ქალი რეინჯერი სალომე იდოიძე და ქობულეთის მეოთხე საჯარო სკოლის ეკოკლუბის ხელმძღვანელი, ფიზიკოსი მარინა მიმინოშვილი დააჯილდოვეს.

სიგელები და სიმბოლური საჩუქრები მათ სამცხე–ჯავახეთის სამხარეო ადმინისტრაციის ხელმძღვანელმა, ბესიკ ამირანაშვილმა გადასცა.

65 წლის თეიმურაზ ქათამაძე დაცულ ტერიტორიებში 1975 წლიდან მუშაობს.

„ბედნიერი ვარ დღევანდელი დღით, ეს იმას ნიშნავს რომ სახელმწიფო აფასებს ჩვენს წვლილს. მინდა რომ ნახევარი საუკუნე ვიმუშაო“, – ამბობს ყველაზე სტაჟიანი რეინჯერი.

საქართველოს დაცული ტერიტორიების განვითარებაში შეტანილი წვლილისთვის დაჯილდოვდა 57 წლის მარინა მიმინოშვილიც: „ვულოცავ მთელს საქართველოს ამ ბრწყინვალე დღეს“.

"დღევანდელი დღე ძალიან მნიშვნელოვანია ჩვენი ქვეყნისთვის, ყველას გილოცავთ 26 მაისს. დღეს როგორც პირველ ქალ რეინჯერს სიგელი გადმომცეს", – ამბობს სალომე იდოიძე.

საქართველოს დამოუკიდებლობის დღისადმი მიძღვნილი ღონისძიებები ახალციხის ციხეზე 12:00 საათზე დაიწყო და დღის ბოლოს გალა კონცერტით დასრულდება.



[თინათინ ზაზაძე, ახალციხე]