მარიკა ჩიტაშვილი უვადო მოსამართლედ დაინიშნა

იუსტიციის უმაღლეს საბჭოში მოსამართლეობის კანდიდატების შესარჩევი კონკურსის კენჭისყრა დღეს, 23 მაისს გაიმართა. საერთო სასამართლოებში არსებულ 43 ვაკანსიაზე 72 განაცხადი იყო შეტანილი.

იუსტიციის უმაღლესმა საბჭომ სულ 32 მოსამართლე დანიშნა, აქედან 29 – უვადოდ. დანარჩენ ვაკანსიებზე კი ხმათა საჭირო რაოდენობა ვერც ერთმა კანდიდატმა დააგროვა.

29 მოსამართლეს შორის უვადოდ დაინიშნა ახალციხის რაიონული სასამართლოს მოსამართლე მარიკა ჩიტაშვილი.

მარიკა ჩიტაშვილის მართლმსაჯულების სისტემაში რვა წლიანი გამოცდილება აქვს. 2012 წლის პირველი იანვრიდან 2013 წლის ივნისამდე ხაშურის რაიონული სასამართლოს მოსამართლე იყო. 2013 წლის ივნისიდან დღემდე კი ახალციხის რაიონული სასამართლოს მოსამართლეა.

მარიკა ჩიტაშვილი, ახალციხის რაიონული სასამართლოს უკვე მეორე უვადო მოსამართლეა. იუსტიციის უმაღლესმა საბჭომ, მიმდინარე წლის თებერვალში თავმჯდომარე გია ბერაია უვადო მოსამართლედ დანიშნა.

[ლუბა გიორგაძე, ახალციხე]