18 მაისი მუზეუმების საერთაშორისო დღეა

სამცხე–ჯავახეთის ისტორიული მუზეუმის ხელმძღვანელის ციური ლაფაჩის განმარტებით, დილის 10:00 საათიდან, საღამოს 18:00 საათამდე ისტორიულ მუზეუმში შესვლა ყველა ვიზიტორისათვის უფასო იქნება–„გარდა ამისა, მსურველებს 20:00 საათიდან, 01:00 საათამდე შესაძლებლობა ექნებათ, ციტადელზე გადმოინაცვლონ, სადაც გაიმართება ღონისძიება „ღამე მუზეუმში“ და აქაც, უფასოდ დაათვალიერებენ გამოფენილ ექსპონატებს“.

ახალციხის გარდა, მუზეუმების საერთაშორისო დღეს უერთდება ვარძიის ისტორიულ–არქიტექტურული მუზეუმ–ნაკრძალია, სადაც ღონისძიების „ღამე მუზეუმში“ ფარგლებში მოეწყობა, მასშტაბური გამოფენები და სხვადასხვა ღონისძიებები.

საღამოს 18 საათიდან მუზეუმი ვარძიის არქიტექტურული კომპლექსის ქვედასივრცე არამატერიალური კულტურული მემკვიდრეობის მიმართულებით მოღვაწე ხალხური რეწვის ოსტატების ნამუშევრებსა და აგრო-სამრეწველო დარგში ჩართული ფერმერების ნაწარმს დაეთმობა. „ღამე მუზეუმში“ ღონისძიებების პროგრამას თანამედროვე ტექნოლოგიებითა და ეფექტებით გაფორმებული სანახაობრივი წარმოდგენა დაასრულებს.

ვარძიაში, მუზეუმების საერთაშორისო დღისადმი მიძღვნილი ღონისძიებები საქართველოს კულტურული მემკვიდრეობის დაცვის ეროვნული სააგენტოს და აშშ -ის საერთაშორისო განვითარების სააგენტოს (US AID) პროგრამა „ზრდა“ – ს ორგანიზაციული და ფინანსური პარტნიორობით იმართება.

2019 წელს მუზეუმის საერთაშორისო დღის თემაა: „მუზეუმები, როგორც კულტურული ჰაბები: ტრადიციის მომავალი“.

მუზეუმების საერთაშორისო დღე - დაფუძნდა 1977 წლის 18 მაისს, მუზეუმების საერთაშორისო საბჭოს მიერ (ICOM) და ამ თარიღს საერთაშორისო სამუზეუმო საზოგადოება უკვე 40 წელზე მეტია აღნიშნავს. აქცია „ღამე მუზეუმში“ - 2005 წლიდან ევროსაბჭოს პატრონაჟით, ევროსაბჭოს წევრ ქვეყნებში ყოველწლიურად ტარდება. აქციამ, შემდგომ წლებში ფართო მასშტაბი მიიღო და გავრცელდა მსოფლიოს მრავალ ქვეყანაში. 2011 წელს აქციას საქართველოც შეუერთდა, თუმცა, მან ვერ მიიღო ტრადიციული სახე. ტრადიციად „ღამე მუზეუმში“ მხოლოდ 2015 წელს, საქართველოს განათლების, მეცნიერების, კულტურისა და სპორტის სამინისტროს ინიციატივით დამკვიდრდა. აქციის მთავარი მიზანია საზოგადოების ცნობიერების ამაღლება და მუზეუმების, მასში დაცული კულტურული მემკვიდრეობის ნიმუშების ხელმისაწვდომობა.

[sknews.ge]