სოციალური კამპანია ახალდაბაში ხანძრით დაზარალებულთა დასახმარებლად

ბორჯომის მუნიციპალიტეტის დაბა ახალდაბაში, ხანძრის შედეგად დაზარალებული ჭაუჭიძეების ოჯახის დასახმარებლად, სოციალურ ქსელში ინფორმაცია აკა სინჯიკაშვილმა გაავრცელა.

დღეს, 15 მაისს, კი თბილისში, 12:00 - დან 15:00 საათამდე მოქალაქეებს შეეძლოთ ქველმოქმედებისთვის საყოფაცხოვრებო ნივთების და ტანსაცმლის მიტანა.

როგორც „სამხრეთის კარიბჭესთან“ აკა სინჯიკაშვილი განმარტავს, შეგროვდა ნივთებიც და გარკვეული ოდენობის თანხაც: „ჭურჭელს, ტანსაცმელს, საჭმელსა და წამლებს ჩავუტანთ. თანხით პროდუქტებს ვუყიდით და საღამოს ექვს საათზე უკვე ახალდაბაში ვიქნებით. ერთი „მარშუტკაა“ ნახევრამდე სავსე და აქ რაც არის ერთ ოჯახს თავისუფლად ეყოფა. სახლის აშენებას ძალიან ბევრი ფული უნდა ვერ მოვახერხებთ მაგას, მაგრამ დანარჩენი რაც დასჭირდებათ ყველაფერს ჩავუტანთ“.

ახალდაბაში ჭაუჭიძეების სამსართულიან სახლს, ცეცხლი 12 მაისს, გამთენიისას გაუჩნდა. ხანძრის შედეგად დაიწვა სამსართულიანი სახლი, მარანი, სათავსო და ხის საამქრო. ჭაუჭიძეების ექვსსულიანი ოჯახი ღია ცის ქვეშ დარჩა.

[თაკო ფეიქრიშვილი, ბორჯომი]