NDI-მ მრჩეველთა საბჭოს ეფექტიანობის შესახებ შემაჯამებელი შეხვედრა გამართა

მრჩეველთა საბჭოს თავმჯდომარედ ნინო რუხაძის არჩევის შემდეგ საბჭომ მდივნად ჯილდა უჩიძე აირჩია.

„შევთანხმდით, რომ სამი თვის ნაცვლად წევრები ორ თვეში ერთხელ შევიკრიბებით. ასევე შეხვედრებზე გავაჟღერებთ კონკრეტულ გეგმებსა და რეკომენდაციებს, რასაც მერიას წერილობითი ფორმით მივაწვდით. ამის შემდეგ კი დაველოდოთ მათ ნაბიჯებს“, - ამბობს საბჭოს თავმჯდომარე ნინო რუხაძე.

მისი თქმით, უახლოეს მომავალში საბჭოს იდეები მედიისთვისაც გახდება ცნობილი.

ზაზა მელიქიძის აზრით, მსგავსი საბჭო ყველა მუნიციპალიტეტში უნდა ფუნქციონირებდეს: „ის უნდა მუშაობდეს საზოგადოების საჭიროებებზე, მოქალაქეებს ნამდვილად აქვთ ინტერესი და ჩვენ მზად ვართ მრჩეველთა საბჭოს მიერ შემუშავებული რეკომენდაციების განსახორციელებლად“.

შეხვედრაზე სტუდენტმა თაკო თუმანიშვილმა საბჭოში ახალგაზრდების მეტ ჩართულობაზე ისაუბრა: „წინა შეხვედრაზე ითქვა, რომ ახალციხე სტუდენტური ქალაქია, თუმცა საბჭოში არ არიან სტუდენტები, ვფიქრობ უკეთესი იქნება თუ ახალგაზრდების აზრს მეტად გავითვალისწინებთ“.
„ახალგაზრდებთან კომუნიკაცია ჩვენც გვაქვს დღისწესრიგში,“ - უპასუხა რუხაძემ.

ომარ ჯაყელმა საბჭოს ეკონომიკური საკითხებით დაინტერესებისკენ მოუწოდა და მხარის ინდუსტრიულ პოლიტიკაზე გაამახვილა ყურადღება: „აქ გვაქვს უმაღლესი ხარისხის ბაზალტი და აგატი, რაღაც მიზეზების გამო ორივეგან წარმოება გაჩერებულია. მსგავს საკითხებზე უნდა დავფიქრდეთ“.

შეხვედრის მიზანი საბჭოს გაძლიერება, ადგილობრივი სამოქალაქო საზოგადოების, მედიისა და პარტნიორებს შორის თანამშრომლობის ხელშეწყობაა.

შეხვედრა NDI-მ ადგილობრივი თვითმმართველობის პროგრამის ფარგლებში, ეროვნული წვლილი დემოკრატიისთვის (NED) დაფინანსებით გამართა.



[ავთო ინასარიძე, ახალციხე]