დეპუტატობის ‘უჩინარი’ კანდიდატები აბასთუმანში

საკრებულოს შულაედურ არჩევნებამდე 25 დღით ადრე N2 აბასთუმნის საარჩევნო უბანზე რეგისტრირებული ცხრა კანდიდატიდან წინა საარჩევნო კამპანიაში ჩართული მხოლოდ ერთი, „ქართული ოცნების“ დეპუტატობის კანდიდატი გენადი ბოლქვაძეა. იგი 25 წელია აბასთუმანში ცხოვრობს და ადგილობრივები კარგად იცნობენ. რაც შეეხება სხვა კანდიდატებს, როგორც კურორტზე მცხოვრებლები ამბობენ, არცერთი მათგანი ადგილობრივი არაა. აბასთუმანში 20–მდე გამოკითხული ადგილობრივი ამბობს, რომ მათი სახელები და გვარები პირველად „სამხრეთის კარიბჭისგან“ გაიგეს.

„ბოლქვაძის გარდა სხვა კანდიდატებიც თუ იყვნენ ესეც არ ვიცოდი. მაგ გვარის ხალხი მგონი აბასთუმანში საერთოდ არ არის და ჩვენ საიდან უნდა ვიცოდეთ. არ ვიცით დანარჩენი რვა კანდიდატი ვინ არის. აქაურები არ არიან და რისი იმედი აქვთ ეგეც არ ვიცი“, – გვეუბნება ადგილობრივი კაკო ცისკარაძე.




„ოცნების“ კანდიდატი გენადი ბოლქვაძე ქედის რაიონში, სოფელ ახოში დაიბადა. ჯარში სავალდებულო სამსახური აბასთუმანში გაიარა, ოჯახიც აქვე შექმნა და დასახლდა. ამბობს რომ კარგად იცნობს დაბას და მისი პრობლემების შესახებაც ყველაფერი კარგად იცის. „ქართულ ოცნებას“ კი 2012 წლიდან შეუერთდა და ფიქრობს, რომ ამ გუნდის წევრებთან ერთად ბევრ კარგ საქმეს გააკეთებს.

მისი თქმით, აბასთუმანში მთავარი პრობლემა უმუშევრობა იყო, თუმცა ეს მას შემდეგ გადაიჭრა, რაც კურორტზე მასშტაბური მშენებლობები დაიწყო.

ბოლქვაძე ფიქრობს, რომ ამ არჩევნებში უკონკურენტოა და ამას მისი სახელი განსაზღვრავს, თუმცა ვერც იმას უარყოფს, რომ რეალრუად გამარჯვებაში ბიძინა ივანიშვილის მიერ კურორტზე წამოწყებული მაშსტაბური მშენებლობები დაეხმარება.

ისევე როგორც ადგილობრივები, დანარჩენ რვა კანდიდატს არც გენადი ბოლქვაძე იცნობს: „წარმოდგენა არ მაქვს ვინ არიან, ან საიდან არიან. ის ზუსტად ვიცი, რომ აბასთუმნელები არ არიან. ჩამოვიდნენ, ჩაატარონ წინასაარჩევნო კამპანია, მათ ჩვენ ხელს არაფერში შევუშლით, კონკურენტებად ისეც არ მოვიაზრებ“.

ცხრავე კანდიდატმა, რეგისტრაციისთვის N38 ადიგენის საარჩევნო ოლქს 19 აპრილს, რეგისტრაციის ბოლო დღეს მიმართა. მას შემდეგ „სამხრეთის კარიბჭე“ ამაოდ ცდილობს მათი საკონტაქო ინფორმაციის მოძიებას. კანდიდატების წარმდგენი პარტიები საზოგადოებასთან ურთიერთბის სამსახურის წარმომადგენლებთან გვამისამართებენ, საზოგადოებასთან ურთიერთობის სამსახურის წარმომადგენლები კი პარტიების ხელძღვანელებთან.

„პარტიის თავმჯდომარე როცა გადაწყვეტს, რომ კანდიდატმა კომენტარი გააკეთოს, ჩვენ თვითონ დაგიკავშიორდებით, კონკრეტულ დროს ვერ დაგისახელებთ. პარტიის მაჟორიტარობის კანდიდატი კი დავით ალხანაშვილია“, – გვითხრეს „პოლიტიკური პლატფორმა –ახალი საქართველოს“ მედიასთან ურთიერთობის სამსახურის წარმომადგენელმა.

[ლუბა გიორგაძე, ადიგენი]