აბასთუმანში ტუბსაავადმყოფოს დემონტაჟი მიმდინარეობს

აბასთუმანში ტუბსაავადმყოფოს შენობის ნაწილი უკვე დანგრეულია. ტერიტორიაზე, სადაც მძიმე ტექნიკა მუშაობს, „სამხრეთის კარიბჭე” არ შეუშვეს. აქ ადგილს სასტუმროს ასაშენებლად ამზადებენ.

„ჯერ პროექტი ჩვენ არ გვაქვს, რომ ზუსტად ვიცოდეთ როგორი იქნება შენობა, მაგრამ თანამედროვე და გრანდიოზული სასტუმრო რომ იქნება, ეს ვიცით“, – გვითხრეს ადიგენის მუნიციპალიტეტის მერიაში.



15 თებერვლას ტუბსაავადმყოფოს მიმდებარე ტერიტორია აქუციონის წესით მართლაც ბიძინა ივანიშვილთან დაკავშირებულმა ოფშორში რეგისტრირებულმა კომპანიამ იყიდა. 16004.00 კვ.მ. არასასოფლო-სამეურნეო დანიშნულების მიწის ნაკვეთი, რომელზეც ერთი შენობა–ნაგებობაა განთავსებული, 2974.00 კვ.მ. არასასოფლო-სამეურნეო დანიშნულების მიწის ნაკვეთი და მასზე განთავსებული ნანგრებვი, ასევე, 4607.00 კვ.მ. არასასოფლო-სამეურნეო დანიშნულების მიწის ნაკვეთი 3 485 000 ლარად შპს „სანაპიროს ხედმა“ შეიძინა. მისი 100%–იანი წილის მფლობელი სააქციო საზოგადოება „ლაიმსთოუნ ფაინანს ინთერნეიშენელია“. ეს კომპანია პანამაშია რეგისტრირებული. რაც შეეხება მის ივანიშვილთან კავშირს, ამის შესახებ 2017 წელს, თბილისში იპოდრომთან დაკავშირებული საკითხების დროს გაირკვა. ოთხ ზონად დაყოფილ ტერიტორიას იპოდრომთან შპს „ინვესტალ კაპიტალი“ ფლობს, „ინვესტალ კაპიტალის“ 100%–იანი წილის მფლობელი კი სწორედ სააქციო საზოგადოება „ლაიმსთოუნ ფაინანს ინთერნეიშენელია“.

აბასთუმანში ტუბსაავადმყოფო პაციენტებისთვის სამკურნალოდ მარტში, მანამდე დაიკეტა, ვიდრე ახალ სარეაბილიტაციო ცენტრს გახსნიდნენ. საავადმყოფოში მკურნალი 25 პაციენტიდან, 18 სახლში გაუშვეს და ამბულატორიულ მკურნალობაზე გადაიყვანეს, ექვსი თბილისში ტუბერკულიოზისა და ფილტვით დაავადებულთა ეროვნულ ცენტრში, ერთი კი ფსიქიატრიულში გადაიყვანეს.

ამ დროისათვის, ახალ ფილტვით დაავადებულთა სარეაბილიტაციო ცენტრში ეზოს მოწყობის სამუშაოები მიმდინარეობს და შენობაში კი მალე ახალ ინვენტარს შეიტანენ. სარეაბილიტაციო ცენტრი მუშაობას სავარაუდოდ მაისის ბოლოდან დაიწყებს.







[ლუბა გიორგაძე, ადიგენი]