ზაზა ჩაჩანიძე ბორჯომის საკრებულოდან გარიცხეს

როგორც ბორჯომის საკრებულოს თავმჯდომარე გიორგი გოგიჩაიშვილი „სამხრეთის კარიბჭესთან“ საუბარში აცხადებს, გადაწყვეტილება ჩაჩანიძის გარიცხვის შესახებ, იურიდიული კომისიის დასკვნის შემდეგ მიიღეს: „საკრებულოს იურიდიულმა კომისიამ დადო დასკვნა, რომ ჩაჩანიძე ექვსი თვის განმავლობაში საკრებულოს მუშაობაში არ მონაწილეობდა. ამიტომ გავრიცხეთ და ახლა ცესკოს უნდა მივმართოთ, რომ პროპორციული სიის მიხედვით ახალი დეპუტატი შემოგვიყვანოს“.

შეგახსენებთ, რომ 2018 წლის განმავლობაში ბორჯომის საკრებულოში სულ 17 რიგგარეშე და გეგმიური სხდომა ჩაატარა. წარმომადგენლობითო ორგანოდან გამოთხოვილი ინფორმაციის მიხედვით, 17 სხდომიდან ჩაჩანიძე მხოლოდ სამს დაესწრო, მას არც საკრებულოს სხვა საქმიანობაში მიუღია მონაწილეობა. თვითმმართველობის კოდექსის მიხედვით კი დეპუტატი, რომელიც ექვსი თვის განმავლობაში ზედიზედ არასაპატიო მიზეზით ესწრება უფლებამოსილება უნდა შეუწყდეს.

რატომ არ ესწრებოდა სხდომებს ჩაჩანიძე უცნობია. „სამხრეთის კარიბჭემ“ მასთან დაკავშირება ვერ შეძლო.

[ლუბა გიორგაძე, ბორჯომი]