არასამთავრობო ორგანიზაცია „ტოლერანტში“ ამბობენ, რომ სახელმწიფო სტრუქტურებმა დაუშვეს ძალიან უხეში დარღვევა, როცა გამოგონილი საბაბით მინარეთის დემონტაჟი დაიწყეს.
„მთავრობის წარმომადგენლებმა უნდა გააკეთონ დასაბუთებული განმარტება იმის შესახებ, თუ რა მიზეზით მოხდა მინარეთის დემონტაჟი და ეს უნდა იყოს დამაჯერებელი“, - ამბობს „ტოლერანტის“ მენეჯერი გოჩა ნათენაძე.
ამავე ორგანიზაციის თავმჯდომარის ცირა მესხიშვილის თქმით, ხელისუფლებას შეეძლო მინარეთის დემონტაჟი ისე განეხორციელებინა, რომ შეხლა-შემოხლა თავიდან აეცილებინა: „ყველაზე დიდი ნაკლი ახლანდელი და წინა ხელისუფლების არის ის, რომ მათ არ აქვთ ხალხთან კომუნიკაცია. რამდენიმე დღით ადრე მისულიყვნენ და ადგილობრივები გაეფრთხილებინათ, რომ აპირებდნენ მინარეთის დემონტაჟს, ეს ძნელი გასაკეთებელი იყო!?“
ორგანიზაცია „დემოკრატ მესხთა კავშირის“ წარმომადგენელი გია ანდღულაძე მინარეთის დემონტაჟის ფაქტში ლოგიკას ვერ ხედავს და ამბობს, რომ ეს კონფლიქტი წესით არცერთ მხარეს არ აწყობდა: „იდეაში, ეს არ უნდა აწყობდეს არც ხელისუფლებას, არც სახელმწიფოს და არც ადგილობრივ მოსახლეობას. ამ მოვლენებს თვალყურს ადევნებდა ჩვენი ორგანიზაციაც და ბევრი კითხვა გაგვიჩნდა. ჩვენ ვერ ვნახეთ კანონი, რომელიც შემოსავლების სამსახურს ამ ქმედების განხორციელების უფლებას აძლევდა. მეორეს მხრივ, კანონი მოქალაქეებს თავისუფალი აღმსარებლობის უფლებას აძლევს“.
ანდღულაძე ამბობს, რომ ეს პირველი შემთხვევაა, როდესაც სახელმწიფო მხარეს წარმოადგენდა: „ჩვენს რეალობაში ასეთი შემთხვევები იყო, თუმცა სახელმწიფო ყოველთვის მედიატორის როლს თამაშობდა. სამწუხაროდ და ჩემდა გასაკვირად, ამ შემთხვევაში სახელმწიფო მხარე აღმოჩნდა“.
სახელმწიფოს პოზიციაზე საუბრობს გოჩა ნათენაძეც. მისი თქმით, ხელისუფლება უნდა დაფიქრდეს რას ებრძვის და ვის უპირისპირდება.
„შენ მოქალაქეებს იპირისპირებ? ეს როგორ შეიძლება?! აფხაზეთის და სამაჩაბლოს საკითხი გადაწყვიტეს, ახლა აჭარის საკითხი დადგა დღის წესრიგში?!“-ამბობს ნათენაძე.
„დაარღვიეს არა ერთი, არამედ მთელი ჯგუფის, თემის კონსტიტუციური უფლება. ვინ დგას ამ ყველაფრის უკან არ ვიცი“, - ამბობს ცირა მესხიშვილი.
ჭელაში მომხდართან დაკავშირებით "ტოლერანტმა" დღეს ოფიციალური განცხადებაც გაავრცელა.
"რელიგიური აღმსარებლობის, რწმენის თავისუფლება არის და იქნება ადამიანის უფლებების ფუნდამენტური რგოლი, რომლის გარანტიც კონსტიტუციაა. კონსტიტუციური უფლებების დაცვა, მისი უზრუნველყოფა კი ქვეყნის ხელისუფლების უმთავრესი მოვალეობაა. უკიდურეს შეშფოთებას სწორედ ხელისუფლების წარმომადგენელთა მხრიდან კონსტიტუციის უმთავრესი პრინციპების უხეში ხელყოფა იწვევს. მიგვაჩნია, რომ მსგავსი პრეცენდენტები არა მარტო აკნინებს და ეჭვის ქვეშ აყენებს საქართველოს სურვილს, ეზიაროს ევროპულ ფასეულობებს და მონაწილე გახდეს იმ ცივილიზაციის, რომელშიც უმთავრესი ღირებულება ადამიანია, არამედ სერიოზული ბზარი შეაქვს სახელმწიფოს მშენებლობის ძალზე რთულ პროცესში. ხელისუფლებამ სასწრაფოდ უნდა უზრუნველყოს შელახული კონსტიტუციური უფლებების აღდგენა და შემდგომში მსგავსი ფაქტების პრევენციის გზით საკუთარ მოქალაქეებს დაუბრუნოს სახელმწიფოსადმი სრული ნდობა", - ნათქვამია განცხადებაში.
[მანანა სარაშვილი, ნინო ზედგინიძე, ახალციხე]