ასპინძა–ახალქალაქის გზაზე კლდეებს ტენდერში გამარჯვებული კომპანია ჩამოწმენდს

„დეპარტამენტის ხელმძღვანელის განცხადებით, მოვლა–შენახვის ფარგლებში ჩამოწმენდენ კლდეებს. ამ ეტაპზე სხვა ინფორმაცია არ მაქვს“, – აცხადებენ საავტომობილო გზების დეპარტამენტის საზოგადოებასთან ურთიერთობის სამსახურში.

შპს „მესხეთ ავტოგზას“, რომელთანაც საავტომობილო გზების დეპარტამენტს გზების მოვლა–შენახვის ფარგლებში 2018 წელს ხელშეკრულება ჰქონდა გაფორმებული, თანხა აღარ აქვს.

"ფული აღარ მაქვს, ამიტომ სამუშაოებს ვეღარ ვასრულებ. ახალი ტენდერიც არაა ჩატარებული. გამარჯვებული კომპანია ყველაზე ადრე ერთ თვეში გამოვლინდება, შეიძლება ეს მე სულაც არ ვიყო“, – ამბობს შპს „მესხეთ ავტოგზის“ დირექტორი ნოდარ ინსარიძე.

საავტომობილო გზების დეპარტამენტმა ახალი ტენდერი 4 136 302 ლარზე შვიდ მარტს გამოაცხადა, წინადადებების მიღება შვიდი აპრილიდან დაიწყება. აღნიშნული ტენდერით გათვალისწინებული სამუშაოები სამცხე-ჯავახეთში საავტომობილო გზებზე არსებული საგზაო მოძრაობის უსაფრთხოების გაუმჯობესებას გულისხმობს.

ბოლო ორ თვეში, ასპინძა–ახალქალაქის საავტომობილო გზაზე ქვათაცვენის რამდენიმე შემთხვევა დაფიქსირდა. ახალქალაქში, ჩუნჩხის ხიდთან კლდიდან ჩამოვარდნილი ლოდი მიკროავტობუსს დაეცა, რის გამოც 50 წლამდე კაცი მძიმედ დაშავდა. ასპინძაში, სოფელ ნიჯგორთან კი ლოდი მსუბუქ ამტომობილს დაეცა, შემთხვევის შედაგად არავინ დაშავებულა.

ჩუნჩხის ხიდთან მომხდარის გამო, გზებზე არსებული ვითარება გზების დეპარტამენტის გეოლოგებმა შეისწავლეს, მათი რეკომენდაციით აუცილებელია კლდების ჩამოწმენდა და რკინის დამცავი ბადის გაკვრა.

[თინათინ ზაზაძე, ასპინძა]