‘შვილები მივლიან და არსად წავალ’– გალუსტიანი სახელმწიფო მზრუნველობაში გადაყვანაზე

„ჩემი შვილები მივლიან, ამიტომ არსად გადასვლა არ მინდა“, – გვითხრა მან.

ვლადიმერ გალუსტიანს სახელმწიფო მზრუნელობაში გადაყვანა სოციალური საანგეტოს თანამშრომლებმა მას შემდეგ შესთავაზეს, რაც მისი მდგომარეობა შეისწავლეს და დაადგინეს, რომ მწოლიარე მომვლელს საჭიროებს.

მისი ერთ–ერთი შვილი რობერტ გალუსტიანი ამბობს, რომ ფულის საშოვნელად დღის განმავლობაში ქალაქში სხვადასხვა სამუშაოს შესრულება უხდება, ამიტომ სახლში იშვიათადაა და შესაბამისად მამასთან ცოტა დროს ატარებს: „ზეწარს ვუცვლი ხოლმე, მაგრამ ხშირად ისვრება. უჭმელად კი არასდროს დამიტოვებია“.

ასევე, კატეგორიულად უარყოფს იგი მამაზე ფიზიკური შეურაცხოფის ფაქტს: „მეზობელმა იჭორავა, მე ამის გამო რატომ უნდა მიწევდეს თავის მართლება? მამაჩემზე არასდროს მიძალადია, არ ვიცი ვის დასჭირდა ჩემზე ამ ტყუილის გავრცელება“.

რობერტ გალუსტიანი ამბობს, რომ ბოლო დროს მერიის წარმომადგენლებს, "სათნოების სახლიდან" მამასთან მეტი საჭმელი მიაქვთ.

ლოგინად ჩავარდნილი ვლადიმერ გალუსტიანი ორ ალკოჰოლდამოკიდებულ შვილთან ერთად ახალციხეში, დიდიმამიშვილის პირველში ცხოვრობს. როგორც ერთ–ერთი შვილის სიდედრი ამბობს, 82 წლის კაცზე შვილი ფიზიკურად ძალადობს. მეზობლები აცხადებენ, რომ სახლიდან ჩხუბისა და ტირილის ხმა ხშრიად გამოდის.

შესაძლო ძალადობის ფაქტს პოლიცია იკვლევს.

[ავთო ინასარიძე, ახალციხე]