'გალუსტიანმა სახელმწიფო მზრუნველობაში გადაყვანაზე უარი გვითხრა'– სოციალური სააგენტო

სოციალური მომსახურების სააგენტოში „სამხრეთის კარიბჭეს“ განუცხადეს, რომ ვლადიმერ გალუსტიანს დაუხმარებლად გადაადგილება არ შეუძლია და მომვლელს საჭიროებს: „ამის გამო ჩვენმა მუშაკმა მას სახელმწიფო მზრუნველობაში გადაყვანა შესთავაზა, თუმცა მოხუცმა არ ისურვა“.

სოციალური მუშაკები ლოგინად ჩავარდნილი ვლადიმერ გალუსტიანის მდგომარეობით მას შემდეგ დაინტერესდნენ, რაც მის შესახებ „სამხრეთის კარიბჭემ“ მასალა გამოაქვეყნა. თუმცა გალუსტიანების სარეიტინგო ქულა უწყებას გადამოწმებული მანამდე, ცხრა თებერვლას ჰქონდა.

„ოჯახს საკუთრებაში უფიქსირდება კიდევ ერთი ბინა, 39 წლის შვილი კი დეკლარაციის მიხედვით შრომისუნარიანია, ამიტომ ოჯახი სარეიტინგო ქულის მიხედვით დახმარების მიმღები არაა“ – გვითხრა სოციალური მომსახურების სააგენტოს საზოგადოებასთან ურთიერთობის სამმართველოს უფროსმა მარიკა ათუნაშვილმა.

ლოგინად ჩავარდნილი ვლადიმერ გალუსტიანი ორ ალკოჰოლდამოკიდებულ შვილთან ერთად ახალციხეში, დიდიმამიშვილის პირველში ცხოვრობს. როგორც ერთ–ერთი შვილის სიდედრი ამბობს, 82 წლის კაცზე შვილი ფიზიკურად ძალადობს. მეზობლები აცხადებენ, რომ სახლიდან ჩხუბისა და ტირილის ხმა ხშრიად გამოდის.

შესაძლო ძალადობის ფაქტს შსს სწავლობს.

[ავთო ინასარიძე, ახალციხე]