სამცხე-ჯავახეთის უნივერსიტეტში ე.წ. რეგიონული სპეციალობა ვეტერინარია იქნება

რეგიონულმა უნივერსიტეტებმა სასწავლებლის ბაზაზე ისეთი ფაკულტეტი უნდა შექმნან, რომელიც რეგიონის განვითარების კუთხით სასწავლებლის ერთგვარი ნიშა იქნება.

„ჩვენთან ასეთი აგრარული მიმართულება, უფრო ზუსტად კი ვეტერინარიის ახალი, 300 კრედიტიანი საბაკალავრო–სამაგისტრო პროგრამა იქნება. რეგიონული სპეციალობა სახელმწიფოს მხრიდან დაფინანსდება, ამისთვის სასწავლებელი სპეციალურად ცალკე თანხას მიიღებს, რაც უნივერსიტეტში ლაბორატორიის მოწყობას, ასევე, აკადემიურ პერსონალს მოხმარდება“, – ამბობს სამცხე–ჯავახეთის სახელმწიფო უნივერსიტეტის რექტორი მაკა ბერიძე.

შეკითხვაზე, იქნება თუ არა ეს სპეციალობა სტუდენტებისთვის უფასო, ბერიძე გვპასუხობს: „სტუდენტის დაფინანსება განისაზღვრება ერთიან ეროვნულ გამოცდებში მიღებული ქულების რაოდენობით. სასწავლებელში ყველა სპეციალობაზე ადგილების გარკვეული რაოდენობა იქნება უფასო.

როდის მიიღებს უნივერისტეტი სტუდენტების პირველ ნაკადს ვეტერინარიის სპეციალობაზე ჯერ გარკვეული არ არის: „თარიღი უნივერსიტეტის სტრატეგიის დოკუმენტში იქნება გაწერილი”, - ამბობს სამცხე–ჯავახეთის სახელმწიფო უნივერსიტეტის რექტორის მოადგილე ნიკოლოზ ახალკაცი.

ვრცლად ამავე თემაზე შეგიძლიათ ნახოთ გადაცემა "კვირის აქცენტი".

[თორნიკე ზაზაძე, ახალციხე]