მერია საკირეში მცხოვრებ ზეზვა თოფურიანს მკურნალობას დაუფინანსებს

თოფურიანების შესახებ „სამხრეთის კარიბჭეს“ მიერ გამოქვეყნებული სტატიის შემდეგ, ბორჯომის მერი ლევან ლიპარტია ოჯახს ესტუმრა და 37 წლის ზეზვას რეაბილიტაციისათვის მკურნალობის დაფინანსებას დაჰპირდა.

„მერმა მოინახულა ოჯახი, მათ მდგომარეობას გაეცნო და განუმარტა თუ რა აუცილებელი დოკუმენტები უნდა წარმოადგინონ იმისთვის, რომ მუნიციპალიტეტიდან რეაბილიტაციისათვის დაფინანსება მიიღოს. მერია ყველაფერს გააკეთებს იმისათვის, რომ ზეზვა თოფურიანმა რეაბილიტაციის კურსი ნორმალურად გაიაროს“, – გვითხრეს ბორჯომის მერიის საზოგადოებასთან ურთიერთობის სამსახურში.

ბორჯომის მერიამ თოფურიანებს ასევე, სამი კუბური მეტრი საწვავი შეშა გადასცა.

საკირეში მცხოვრები თოფურიანების ოთხსულიანი ოჯახი სოციალურად დაუცველია. ოჯახის ყველა წევრს ჯანმრთელობის პრობლემები აქვს, ზეზვა და მისი მამა კი თითქმის ერთი წელია საწოლს მიჯაჭვულები არიან. ზეზვას მკურნალობისთვის 9 360 ლარი სჭირდება.

[ლუბა გიორგაძე, ბორჯომი]