ბორჯომის ახალმა მერმა მუშაობა დაიწყო

ლევან ლიპარტია მერიაში დილიდან მივიდა. იგი ოფიციალურად არავის წარუდგენია.

„მარტო ვიყავი მისული, თანამშრომლებს შევხვდი და მალევე წამოვედი. შეხვედრები მაქვს და მუშაობას ხვალიდან ჩვეულებრივად გავაგრძელებ“, – განაცხადა „სამხრეთის კარიბჭესთან“ ბორჯომის მერმა ლევან ლიპარტიამ.

გეგმავს თუ არა საკადრო ან სტრუქტურულ ცვლილებებს მერიაში, ლიპარტია ამაზე ჯერ არ საუბრობს. ლიპარტია ამბობს, რომ სამსახურში ყველაფერს დეტალურად გაეცნობა და გადაწყვეტილებებს მერე მიიღებს.

როგორ გააგრძელებს ბორჯომის საკრებულოსთან მუშაობას, რომელის თავმჯდომარეც მისი ყოფილი კონკურენტი და ოპოზიციური პარტიის წევრია, ლიპარტია ჯერ არც ამაზე საუბრობს.

შეგახსენებთ, 2017 წლის 21 ოქტომბრის არჩევნებში, ბორჯომში გამარჯვებული ვერ გამოვლინდა. ლევან ლიპარტიამ, რომელიც კენჭს „ქართული ოცნებიდან“ იყრიდა, „პატრიოტთა ალიანსის“ კანდიდატს ზაზა ჩაჩანიძეს მხოლოდ 24 ხმით აჯობა, თუმცა, პირველტურში გამარჯვებისთვის საჭირო 50%+1 ხმა ვერ მოპოვა.

ბორჯომში მეორე ტური 12 ნოემბერს შედგა. არჩევნების მეორე ტურში, ლევან ლიპარტიამ 55.22% (7615 ხმა), მისმა კონკურენტმა, "პატრიოტთა ალიანსის" კანდიდატმა ზაზა ჩაჩანიძემ კი 44.78% (6176 ხმა) მიიღო. ლიპარტიამ ჩაჩანიძეს 1439 ხმით აჯობა.

[ლუბა გიორგაძე, ბორჯომი]