ბაკურიანობა 2019–ის გასამართად ბორჯომის მერიამ ტენდერი გამოაცხადა

ღონისძიების ფარგლებში მოეწყობა სხვადასხვა სპორტული შეჯიბრება და მასში მონაწილეობას მიიღებენ როგორც ახალგაზრდა, ასევე, ვეტერანი სპორტსმენები. სპორტულ შეჯიბრებებს მუსიკალურად დიჯეი გააფორმებს. სახალხო დღესასწაულში სპორტსმენებთან ერთად, მონაწილეობას მიიღებენ სიმღერისა და ცეკვის ადგილობრივი ანსამბლები, სოლო მომღერლები და სახალხო მთქმელები. მოეწყობა ბარაბან შოუ და ბერიკების პერფორმანსი. ღონისძიება ფოიერვერკით დასრულდება.

ბაკურიანობა 2019–ის გასამართად ბორჯომის მუნიციპალიტეტის მერიის მიერ გამოცხადებულ ტენდერში წინადადებების მიღება 16 თებერვლიდან დაიწყება. სავარაუდო შესყიდვის ღირებულება 41 283 ლარია.

„ბაკურიანობის“ დღესასწაული კურორტზე ყოველ წელს აღინიშნება. სამდღიან ზეიმს, ადგილობრივების გარდა, საქართველოს სხვადასხვა კუთხიდან და უცხოეთიდან ჩამოსული დამსვენებლებიც უერთდებიან.

[თორნიკე ზაზაძე, ბორჯომი]