საავადმყოფოში სხეულზე მრავლობითი დაზიანებით 56 წლის კაცი შეიყვანეს

შემთხვევა, ახალციხეში, ექვს თებერვალს, დღის მეორე ნახევარში მოხდა. სახლში, სადაც შუახნის კაცი ცხოვრობს, არავინ დაგვხვდა. მეზობლები კი ყვებიან, რომ მას კონფლიქტი ოჯახში მოუვიდა.

„ზუსტად არ ვიცი, რა მოხდა. რაზე იკამათეს, მაგრამ შვილთან რომ ჰქონდა უთანხმოება ეს გავიგე და თავი დანით ამის გამო დაუჭრია“, – ამბობს ერთ–ერთ მეზობელი.

„დღის მეორე ნახევარი იქნებოდა, სასწრაფო მოვიდა და წაიყვანეს. თქვეს დაჭრილიაო, მერე გავიგე რომ თავი თვითნ დაუჭრია“, – აცხადებს დაშავებული კაცის მოპირდაპირე მხარეს მცხოვრები.

ახალციხის რეფერალურ ჰოსპიტალში მომხდარზე არ საუბრობენ.

„მხოლოდ ის შემიძლია გითხრათ, რომ ახლა ვინც არიან პაციენტები ჩვენთან, თავს ყველა კარგად გრძნობს“, – გვითხრა ახალციხის რეფერალური ჰოსპიტალის დირექტორმა ხათუნა კეკელაშვილმა.

შინაგან საქმეთა სამინისტროში აცხადებენ, რომ დაშავებული კაცის შესახებ პოლიციაში ინფორმაცია ახალციხის რეფერალური ჰოსპიტალიდან შევიდა და უკავშირდება თუ არა მომხდარი ოჯახურ კონფლიქტს, ამას გამოძიება დაადგენს.

ფაქტს ახალციხის რაიონული სამმართველო სსკ–ს 118–ე მუხლით იძიებს, რაც ჯანმრთელობის განზრახ ნაკლებად მძიმე დაზიანებას გულისხმობს.

[ლუბა გიორგაძე, ახალციხე]